娛樂喧
5個月減 30磅 53歲鄧浩光谷肌爆 seed
影帝張家輝為拍《激戰》勁谷八嚿腹肌，帶起中佬操肌熱潮，連飛魚方力申近日都加入「爆肌男」行列。今年 53歲第一代飛魚王子鄧浩光，早前亦用了 5個月成功減 30磅，由 176磅減到 146磅，最終獲老闆顏福偉睇中拍「活絡油」廣告，將 fit爆身段公諸同好。
鄧浩光十年前退出娛圈轉做市場部經理，結婚後變典型住家男，買餸下廚兼湊女。今次的起心肝操弗，全因女兒嫌他身形走樣。積極操弗後，囡囡都大讚︰「嘩！ Daddy好似 superman！」有女萬事足，鄧浩光愛女之情溢於言表。
鄧浩光 04年轉行，跟隨顏福偉成為白花油的市場部經理。過了十年朝九晚五的文職生活，除了為他帶來九歲女兒 Adrienne之外，更換來一副中佬身形。身高約 5呎 9吋的他，高峰時達 176磅。
「同囡囡遊水時，佢話我身形同以前唔同咗，又話我以前真係好 fit。我心諗即係我依家唔 fit喇！囡囡都講咗年幾，我終於的起心肝去減。最初四個月瘦咗廿磅，到決定要拍廣告時，再去盡啲，一個月內地獄式再減多十磅。廣告出街後，囡囡同我講：『嘩！ Daddy，你好犀利呀，好似 superman咁喎！』我個心甜曬！」鄧浩光說。
照鏡睇成果
曾是香港第一代飛魚的鄧浩光，完成地獄式減肥，全靠運動員的意志力。他自任教練又自訂餐單，連續五個月的早午餐只是食穀物及蔬菜，晚餐食量亦減半。他的秘訣是，無論幾悶都好，減肥時都一定要保持愉快心情。
「其實一定要貪靚先會有動力去減，要同自己嘅肌肉談戀愛，同自己嘅 body溝通，咁你見到有成績自然會開心。仲要成日照鏡，身體先會配合，我睇成果係睇身形靚唔靚，唔係睇尺寸。以前大家只識睇女人點減、點靚，依家掀起男士都要 fit嘅風氣，係件好事。」
以囡囡行先
現時弗爆的鄧浩光，獲不少廣告商垂青，想找他做代言人。他只要求代言的廣告健康及正面，「初步傾緊，仲未落實，要公司批准先可以拍。我唔抗拒拍瘦身廣告，但一定要唔可以影響我現在的生活及工作，又要確保我有時間陪家人及囡囡。我依家係住家男人，星期六、日會買餸煮飯，要陪囡囡。」
鄧浩光提及女兒 Adrienne時，粗獷的他面帶靦覥笑容，自言是「 yes man Daddy」。「我唔係怪獸家長，同囡囡係朋友式相處，我冇迫佢要好似我咁遊水好叻。佢鍾意跳舞，我就俾佢跳舞，總之每晚見嚇佢傾嚇偈，星期六、日陪佢行嚇街，我已經好滿足。」
爆肌男都被女兒收服，怪不得有人話女兒是父親的前世情人
搣脂 30磅餐單
鄧浩光自度的減肥餐單，四個月減去 20磅，最後一個月晚飯升級為「地獄晚餐」，再減多 10磅。此外他每星期做 3至 6日健身，每次兩小時，包括 45分鐘跑步。
早餐：一碗藜麥（ Quinoa）加一份半水煮十分鐘，可以加少許生果
午餐：一碟蔬菜沙律（偶爾加入兩塊雞胸片）
晚餐：住家餸菜（分量為平時的一半）
地獄晚餐：
星期一至五：兩塊雞胸（少油乾煎，可加少許鹽）
星期六及日：住家餸菜（分量為平時的一半）
*肚餓時，鄧浩光建議可飲水或食兩、三粒提子或半隻香蕉。
|
鍾意就快D Share啦！
|
|
|
