志偉阿倫斥TVB裁員無情
無綫（TVB）在7億盈利下，解僱50名幕後員工，昨日TVB職員協會發起黑衣行動嚴厲抗議，抗命員工卻被保安反拍。身為無綫重臣的曾志偉，昨日以黑衫響應活動，提到被削員工時更一度眼濕濕，並暗寸無綫不近人情，令他倍感懷念六叔掌管TVB時的日子。
無綫今年上半年賺7億，上周突然大刀闊斧裁走50名幕後員工，令公司士氣大受打擊！昨日TVB職員協會發起黑衣行動，在將軍澳電視城外穿上黑衣默哀及抗議。昨晚6時開始，已有約50名「黑衣人」聚集在將軍澳電視城門外。無綫如臨大敵，預先安排5名保安守住大閘，其間更用攝錄機拍低現場情況，似是營造秋後算賬及作威嚇狀，手法頗為低莊。
義字行頭的曾志偉，雖與無綫股東之一的陳國強私交甚篤，但亦對公司裁員大感錯愕。昨日他到澳門出席老友譚詠麟（阿倫）代言的餅家開幕禮，決定幫理不幫親，以黑衣響應「黑衣行動」，又暗指無綫不近人情。他說：「梗係啦，大家共事咁多年，真係相當難過。TVB一向以大家庭見稱，之前請咗百幾人，點會生意唔好同廣告萎縮？炒人係難以理解，所以今日着黑衫支持，希望唔會再有第二波。」是否影響士氣？他直認：「某程度上梗係有，公司有公司政策，我冇嘢好講，𠵱家未知進度係點，不過人才係需要留嘅，嚟緊有好多競爭。」問到是否有點心淡？志偉眼濕濕，搖頭嘆氣謂：「始終咁多舊人走咗，喺TVB廿幾年都好似大家庭咁，𠵱家多咗好多唔識嘅人，都係㗎，有啲喺無綫做咗好耐嘅員工，一啲有病或明年退休員工都被炒，其實係咪可以將佢哋調去另外部門，畀佢哋留低呢？我好懷念邵氏（邵逸夫）同鄒生（鄒文懷）過往處理方法，邵氏結業後，員工家屬都可以留低住員工宿舍。」
【群起抗議】
■昨日有50名員工穿上黑衣，抗議無綫在盈利下依然裁員。
【傳媒追訪】
■無綫上半年有7億元盈利，仍裁減50名幕後員工，有傳裁員還有第二波。
【保安反拍】
■TVB職員協會發起黑衣默哀，昨傍晚吸引大批傳媒採訪，無綫保安更反拍示威者。
阿倫爆無綫慳到盡
有傳余詠珊入主綜藝科後，令志偉「無碇企」，兩人屢傳不和。志偉今年明落對方面，不做港姐司儀。近日亦有傳余詠珊為安插「自己人」到各部門，連維穩節目《東張西望》都被傳要裁減一半員工來遷就。昨提起余詠珊，志偉相當避忌，問是否太不近人情？他說：「幾可惜，可能大家冇共事過，冇咗份感情。」志偉又避談余詠珊，只說：「冇話係矛唔矛頭，大家都為無綫出力。」阿倫雖然沒穿黑衣，卻爆無綫製作慳皮慳到盡：「我都唔知今日有呢樣嘢（黑衣行動）。其實我之前去拍世界盃都係自己出，無綫畀好少。我聽日去澳洲做《左麟右李》，無綫知道後都叫我哋拍埋畀台慶旅遊特輯。」是否太慳？他笑着說：「只係增加號召力，酬勞一定冇，但TVBuddy一定有。羅蘭姐收插蘇都幾實用！」
至於近年不斷為無綫拍劇的三哥苗僑偉亦有穿黑衫，他說﹕「我外黑內白，外面係支持佢哋，但我覺得公司裁幾十人影響唔係好大。」同場還有謝賢出席，他全程表現風騷，但未知是否怕被追問兒子謝霆鋒和王菲復合，剪綵完畢即離開。
【黑衫響應】
■曾志偉（右）一身黑衫以行動力撐被裁員工，阿倫亦爆無綫慳皮製作。
■苗僑偉自言外黑內白暗撐黑衣行動。
協會提出三大訴求
此外，TVB職員協會指摘公司在7億盈利下無理解僱幕後人員，感到極不公道，又斥公司「唯利是圖」，只視員工為生財工具。協會提出三大訴求，包括停止裁員、讓被裁同事以合理條件復職及與協會積極對話，又提到若公司漠視協會訴求，不排除有進一步行動。無綫電視外事部副總監曾醒明回應記者時說：「無綫一向非常珍惜同重視同事們辛勞付出同努力，但希望同事明白到任何一間商業機構有需要時候都會作適當，無論係運作或營運上一啲資源嘅重組，咁就可以繼續加強競爭力。」
採訪：張俊銘（澳門）、文國駿
攝影：仇志德
|
鍾意就快D Share啦！
|
|
|
