朱慧敏搶閘報囍嫁Eddie
拍拖三年的彭懷安（Eddie）與朱慧敏於昨日大年初一迎「春」接福，宣布於明年結婚！原來Eddie前晚行花市後，以百合花及鑽戒向女友再求婚，得米後於微博報喜，他透過電話否認女友大肚，今年則積極搵錢娶妻。雖然待嫁新娘以「沒有戲劇性嘅浪漫」形容雙方感情，但明顯Eddie為求婚一事絞盡腦汁！
朱慧敏
彭懷安
昨日大年初一，娛樂圈即迎來羊年第一樁喜事，拍拖三年的前EO2成員Eddie與藝人朱慧敏（Queenie）宣布明年拉埋天窗！35歲的Eddie昨日於微博報囍指前晚向33歲女友Queenie求婚成功：「從此以後，無論墳前或人前，由你說願意開始，我將會用盡一生去愛你，保護你，直到老死，朱，我愛你！」除公開冧爆愛的宣言，他又上載吻額「蜜」照及鑽戒照，大放閃光彈！
婚禮在明年
Eddie昨日接受本報電話訪問時大方披露求婚經過：「之前喺未來外母墳前求婚，因為得一紮花，但嗰紮花其實送畀外母，當時Queenie話我花都冇，所以年三十晚六點鐘開始同佢行花市，行足五粒鐘，佢好鍾意節日氣氛，行完維園就去花墟，買咗一紮Queenie最鍾意嘅白色百合，行咗幾粒鐘，都冇返屋企食團年飯，因為我哋想過二人世界。返到去我就拎住紮百合花正式向Queenie求婚，喺年三十晚求婚成功！」對於懷孕傳聞，Eddie即否認：「絕對唔係！我哋婚期定喺2016，點會咁快有B！Queenie冇覆記者係佢唔舒服瞓緊覺，可能前一晚行完花市唔舒服。大家好享受溫馨時刻，所以着埋同一款T-shirt向大家宣布喜訊，未來大計就係積極搵錢，籌備2016年嘅婚禮！」
至於待嫁Queenie未答允下嫁Eddie前，曾接受本報獨家專訪並表示對愛情抱隨緣心態：「真係見步行步咋！以前拍拖我係希望結婚，但好多時都事與願違囉！依家感情上、事業上對得住自己，個結果係點已經唔再諗喇，無論個結果係點都覺得係好嘅！」當日她提起Eddie時亦難掩幸福：「好信任！尤其是大家都做呢行，都影響我好深，互相感染。我哋之間相處冇戲劇性嘅浪漫，就係簡單舒服嘅陪伴。」
Queenie唔派利是
現時合力打理餐廳生意的Eddie與Queenie，雖未正式結婚，惟言行舉止已十足老夫老妻！新年亦忙於落舖打點的Queenie笑說：「今年都希望繼續努力事業，搞好盤生意！」提到最難忘的農曆新年，她說：「有年賣氫氣球，我阿媽、表弟妹嗰啲全部一齊賣！其實係啲大人喺度傾偈，我哋自己賣。」已升呢為老闆娘的Queenie卻揚言不會派利是：「寧願有啲心思嘢，上年同朋友一齊整咗啲有祝福語嘅曲奇送畀人。」Queenie由演員搖身一變成為餐廳老闆，但未有打算轉移重心，希望兩邊兼顧！
彭懷安（Eddie）
年齡：35歲
代表作：1999年以組合EO2成員身份出道，除推出唱片外，亦參演電影，去年演出劇集《使徒行者》「撻沙哥」一角而為人熟悉！
朱慧敏（Queenie）
年齡：33歲
代表作：2004年勇奪香港小姐亞軍後入行，演過劇集《畢打自己人》及電影《竊聽風雲》等，2012年擔正處境劇《愛．回家》女主角尹德如，成功入屋！
朱慧敏
彭懷安
|
鍾意就快D Share啦！
|
|
|
