黃宗澤狂戀JUN驚爆私家偵探跟蹤
本報日前獨家直擊男神黃宗澤（Bosco）與日模JUN同返酒店宿一宵，昨日護JUN心切的他強調：「我哋分房瞓o架！」不過本報連日來追訪Bosco期間，竟發現一架神秘「冚旗」的士由朝到晚跟住Bosco，經了解後對方竟自稱為私家偵探！Bosco得悉後即時驚說：「吓！我唔知喎！你咁講我好驚喎！」
有愛情滋潤的Bosco，昨日拍攝新劇時春風滿面，不時笑到四萬咁口。
Bosco日前被《東網》獨家直擊他與日籍女模JUN齊齊行超巿濕平。
自稱是私家偵探的男女在一架神秘「冚旗」的士上等候。
Bosco對於被指有私家偵探在寓所門外等候感到驚訝！
Bosco表示與JUN因拍攝廣告而認識，現正在了解中。
日前本報獨家踢爆圈中筍盤黃宗澤戀上相識兩至三年、身形高挑、早前曾合作拍攝美白廣告的日籍索模JUN，日前更直擊兩人齊齊出動買餸煮飯仔，更於同一間酒店「宿一宵」！正當大家為Bosco終於找到新女友而高興之際，卻有離奇事件出現！
首先記者在追訪期間，本報不斷收到有關Bosco新女友背景的爆料消息，奇就奇在爆料中的新女友身份背景與日模JUN有所出入，爆料內容一時指此女子是Bosco契妹，一時又說是師妹，Bosco已逐一否認，其後更離譜的是指她是兩個小孩之母，Bosco即以「無稽」直斥爆料者！但更離奇的是，本報記者連日在Bosco寓所樓下等候期間，發現有一架神秘「冚旗」的士由朝到晚跟住Bosco，經了解後，車上幾名男女自稱私家偵探，問到何以要等Bosco時，對方未有透露原因。
開工勁風騷
事件男主角Bosco昨日於九龍城拍攝無綫新劇《幕後玩家》，大批傳媒等候。春風滿面的他遲約一個鐘才到達現場開工，其後又返電視城繼續拍攝，兩度大方談及新歡。當記者提到有自稱私家偵探的男女在他寓所樓下等候時，Bosco立即面露驚訝說：「吓！我唔知喎！你咁講我好驚喎！一陣返去要留意吓先！」其後記者問他是否已展開新戀情時，他即甜絲絲說：「十畫都未有一撇呀！仲有好多撇，都係了解吓啫，我哋係拍廣告嗰時識，平時都係用短訊傾吓閒偈。（影到你哋同房瞓喎！）咁啱我屋企裝修，我喺嗰間酒店度住，人哋嚟香港旅行，又問我住邊度好，我咪介紹畀佢同幫佢Book埋囉！（住同一間房？）梗係分開房佢都有畀番房錢我o架！」
提到被影到拍拖買餸玩煮飯仔時，他又再次埋怨記者「阻住晒」：「咁我都要食飯o架！都話你哋班人應該遲啲先出現嘛！激死呀！本身諗住行完超市同佢食下午茶，畀你哋見到，佢唔太熟悉香港娛樂圈，嚇親人喇！你哋都唔畀時間人哋了解，阻住人哋識女仔！」
要加深了解
談到是否已互生好感，Bosco即連番強調彼此是朋友關係，更大爆平日與對方以英語溝通：「我哋講英文囉！（你英文咁好o架咩？使唔使加身體語言？）唔使，咁我都有讀過書嘅！（為佢學日文？）呢個提議都好喎，咁我可以請教吓佢日文。」問到有否趁機帶JUN見家長時，他說：「我媽咪唔喺香港。（JUN對你有意思？）了解吓先啫！佢都就走（會唔會送機？）我唔得閒喎！（飛過去搵佢？）佢喺東京嘅，咁如果去到咪搵吓囉！」
記者多次追問是否有好感時，他說：「你哋唔好講到咁一陣交唔到貨你哋又話，交到貨你哋又話！（係咪即係有好感啫？）OK」最後當記者問到JUN會否已有男朋友時，Bosco即超大反應說：「冇呀嘛！」明顯對女友及這段情相當緊張！
採、追蹤組、影視組
文：專案組
有愛情滋潤的Bosco，昨日拍攝新劇時春風滿面，不時笑到四萬咁口。
Bosco日前被《東網》獨家直擊他與日籍女模JUN齊齊行超巿濕平。
自稱是私家偵探的男女在一架神秘「冚旗」的士上等候。
Bosco對於被指有私家偵探在寓所門外等候感到驚訝！
Bosco表示與JUN因拍攝廣告而認識，現正在了解中。
|
鍾意就快D Share啦！
|
|
|
