掃呢頁CODE去手機

2013年5月31日 星期五

孖公仔




博出位

孖公仔

差佬就話要行孖 beat,潛水又一定要有 buddy啫!估唔到班藝人都興孖公仔影相放微博。曬 3吋事業線嘅高海寧,拍埋微波陳庭欣度,搶曬鏡。明哥黃耀明就同個男吉他手影牀照;連胡定欣都 chok住孖岑麗香玩自拍。無論男男抑或女女,一樣咁開心。

高海寧吋贏好姊妹

雖然張相係陳庭欣用手機影兼放上微博,但高海寧嗰條 3吋長嘅事業線,遠遠拋離對方只得 3cm嘅事業線。不過陳庭欣絕唔介意比下去,亦無損二人姊妹情。

黃耀明大被同眠

明哥黃耀明搵埋「好友」何山,喺酒店大牀上面靜坐( Bed-in是外國一種表演形式)。呢張絕無僅有嘅牀上照,係想向社會宣揚平等同大愛信息,就連何韻詩亦喺微博留言想參與。

萬綺雯含情脈脈

萬綺雯喺微博放咗張同三哥苗僑偉好 sweet嘅合照,兩人手貼手零距離,蚊蚊仲含情脈脈㖭!雖然只係新劇《好心作怪》劇照,但睇得出蚊蚊真係好冧,好投入囉!

胡定欣遇攝石人

胡定欣喺新劇《貓屎媽媽》演岑麗香後母,日前佢喺外景車無聊 chok樣自拍,阿女香香即時擺出港女招牌勝利手勢入鏡,呢位攝石人好鬼馬喎!

陳奐仁拉麵誘惑

近期多咗客串電影嘅創作歌手陳奐仁,呢排又有戲拍喇!新戲《溝女不離三兄弟》入面,蔣家旻就扮人肉「拉麵」四圍拉客,陳奐仁呢個四眼仔食客,見到好嘢流曬口水啦!



鍾意就快D Share啦!