掃呢頁CODE去手機

2014年4月24日 星期四

[壹週刊 1259] 點林峯買蟹 吳千語黐 Baby搵食 Baby,吳千語,千語,Angelababy,M1,




近日頻頻黐住 Baby玩共食的千語,這晚二人約埋朋友歎西班牙菜。

探熱針

點林峯買蟹 吳千語黐 Baby搵食

原本打算在影圈大展拳腳的吳千語,自從被「七愛」林峯私有化,工作明顯放慢手腳,只顧吃喝玩樂,日前更孖住好姊妹 Angelababy歎西班牙菜,二十四孝林峯收工後即趕到現場埋單兼做阿四,負責攞外賣辣蟹。

Baby有土豪黃曉明送三手林寶示愛,千語 BB就有跟得林峯隨時候命,各取所需。











唔捱得

去年電影、主持雙線發展的吳千語,今年工作量明顯大倒退,只肯出席時間短、又可以賺錢買花戴的品牌扮靚活動。據知千語 BB經理人黃百鳴見佢掛住拍拖無心工作,原本為她度身訂造、一心捧做動作女星的計劃,只好全部無限期擱置,「其實黃百鳴睇好千語,計劃今年開套動作片俾佢擔正,而家唔諗啦,早排有套大陸劇搵千語拍,價錢又高,但千語聽見要返大陸幾個月,即刻耍手擰頭唔肯接,有錢唔願賺,擺明 hea住等嫁林峯做少奶奶,黃百鳴又錫到佢燶,做定唔做,全部俾佢自己話曬事。」知情人說。

千語寧願坐 Baby的林寶跑車離開,由得林峯(箭嘴)與朋友結伴離開。

林峯開完工趕到 Catalunya會合 BB,離開時負責埋單。

離開餐廳前林峯曾到門外找朋友吹水,日日開工的他面容憔悴。

林峯與朋友殿後,女友繼續與 Baby做孖公仔,齊齊安慰無乜心機的馬天佑。

Hea做等嫁

吳千語一一年出道拍電影《開心魔法》,雖然唔算多產,但都 keep住開工拍戲。自從做了林峯的私家 BB後,千語為箝住男友陪玩陪食陪開工,今年電影、劇集一律唔接,齋做活動, hea住等嫁。

南非睇鑽石

本月為鑽石品牌宣傳,更獲邀與 Wyman到南非採鑽石,行程包食包住眼界大開,疏乎到爆。

扮靚曬幸福

接 job唔要辛苦的她,三月扮到靚靚出席名牌手袋慶祝活動,分享男友林峯送袋給她的心情。

賀歲甜到漏

二月到時代廣場出席「金獅醒獅賀新歲」活動及獲邀到海洋公園出席情人節活動,點嚇睛影嚇相,好快收工。

獲贈母女鞋

一月出席名牌鞋履活動,更得品牌贈送一 pair母女鞋,未結婚就講定生女經,曬幸福。

馬天佑早前為 Baby出席電影金像獎頒獎禮揀戰衣,二人交情非淺。

歎貴香檳

只顧拍拖同吃喝玩樂的千語 BB,上週五(四月十八日)晚上七時半,孖住好姊妹 Angelababy同幾個朋友,到灣仔的 Catalunya歎西班牙菜,座上客更包括在今屆金像獎頒獎禮,幫 Baby揀戰衣助她贏得「最佳衣著獎」的服裝指導馬天佑。

三五知己,一邊開餐,一邊歎香檳,之後更細聲講大聲笑。食到九點,拍完無綫劇收工的林峯,坐住公司保母車趕到,做跟得男友兼俾錢埋單。

龜速辣跑

食飽走人,千語 BB並無第一時間黐實男朋友,反而坐上 Baby的三手林寶,林峯惟有跟馬天佑企街截的士。雖然話香車配美人,但路盲 Baby只能以龜速三十公里行駛,幾經辛苦,才由灣仔駛到銅鑼灣的橋底辣蟹,泊好車後,兩女興高采烈走入店內買外賣,辣蟹做消夜。

兩個 BB坐林寶得個樣,由灣仔到銅鑼灣,一直以龜速前進。

Baby同千語到橋底辣蟹點完菜,發現泊在街上的林寶圍滿影相的途人,二人無奈企街等上車。

林峯攞外賣

與馬天佑坐的士一早到達的林峯,待女友點完菜,繼續企在店內找數兼等外賣;千語 BB同 Baby原本打算返上三手林寶歎冷氣,可惜辣跑泊街太招搖,引來大批途人企在車旁影合照,其間 Baby人急智生,開啟汽車防盜欲驅散人群,惜不得要領,結果要企在街再等途人散去後才可以返上車,此時任勞任怨的林峯剛好等完外賣,一行四人轉場開餐,繼續玩樂。

林峯攞完蟹與馬天佑上的士,千語同 Baby則乘林寶離去。



鍾意就快D Share啦!