《宗師》偉仔失影帝愁爆飲悶酒
【第33屆香港電影金像獎頒獎禮之大贏家】王家衛執導的電影《一代宗師》前晚在香港金像獎狂擸12個獎，偏偏男主角梁朝偉失落影帝殊榮，本報直擊後台和慶功宴實況，斯人獨憔悴的偉仔愁爆飲悶酒，獲導演和好友吳廷燁輪流安慰，老婆劉嘉玲反而陪影後章子怡吹水醫肚，以嘉賓身份到賀的Angelababy就黐實王家衛合照，還公然在室內違例扯煙，女神形象幻滅。
第33屆香港電影金像獎前晚假尖沙嘴文化中心舉行，賽前獲14項提名的《一代宗師》橫掃12個獎項，包括最佳電影、最佳導演、最佳女主角、最佳男配角等，可惜梁朝偉卻敗給《激戰》的張家輝，未能創下六度封帝的紀錄！本報直擊後台和慶功宴實況，當宣佈影帝前，嘉玲和負責頒獎的楊千嬅在後台閒聊，千嬅㩒肚自嘲：「之前實在太肥，可能個胸太細，push唔到。」公佈影帝時在後台的嘉玲獲悉張家輝封帝仍面露笑容保持風度；另梁洛施獲三、四位髮型化妝師服侍，極有排場，Baby則跟彭于晏吹水、睇電視打發時間。
■未能奪影帝殊榮的梁朝偉跟老婆劉嘉玲碰杯，但難掩失落神情。
■王家衛率眾演員上台領《一代宗師》最佳電影獎，失落影帝的偉仔仰天苦笑。
■不愛熱鬧的偉仔全晚避開人群，跟好友吳廷燁飲悶酒。
張震Baby齊犯禁
至於失落影帝殊榮的偉仔，返後台後即呼出一大口氣，之後亦很有風度跟大隊出席慶功宴，於淩晨12時許抵達老婆劉嘉玲於尖沙嘴The One開設的餐廳贈興。場內各人暢飲慶賀笑聲滿載，偉仔則顯得有點悶悶不樂，雖然章子怡早已就坐醫肚，但偉仔卻只站在桌旁，王家衛見狀則陪偉仔密斟，之後王家衛忙著招呼其他人，偉仔則轉到吧台飲悶酒，好友吳廷燁全程陪著他，雖然今時今日獎項對偉仔來說只是錦上添花，輸贏都不重要，但不習慣出席熱鬧場合的他，只畀面逗留了個多小時即閃人。
至於劉嘉玲沒打擾偉仔，讓他們盡情men's talk，她則陪章子怡飲酒吹水，子怡甫坐下即不停食醫肚，又要女友人為她跟影後獎座合照，十分風騷；而去年結婚的張震依然很受女性歡迎，輪流跟張榕蓉、章子怡傾偈；最佳男配角張晉則和老婆蔡少芬坐在一角與友人分享喜悅。
約淩晨1時許，Baby在經理人陪同下到達，經理人馬上介紹Baby給導演王家衛和劉偉強認識，Baby識做地跟兩位導演分別合照，當她與王家衛合照後更向王大導六度鞠躬，之後Baby入VIP房與嘉玲打招呼，隨即熟手地點煙，在室內違例喪扯，令女神形象幻滅，其實Baby於08年被影到當街煲煙，當時她表示只是貪玩學人食煙，還聲言會立即戒煙，怎知卻得個講字！張震亦同樣在室內食雪茄，齊齊犯禁。
■Baby在室內違例扯煙，女神形象幻滅，身後的張震亦食雪茄犯禁。
■Baby黐實王家衛合照，還六度鞠躬表現必恭必敬。
劉偉強醉爆黑幕
其後王家衛、劉偉強和張晉圍埋吹水，飲到半醉的劉偉強粗口亂飛笑對張晉說：「你呢個獎唔應該攞，你唔應該多謝神，要多謝我，提名前一星期冇你名，有人同我講話你做得好，係我加你個名入去。」王家衛聞言笑說：「黑幕囉，頒獎禮點都有黑幕！」之後張晉知劉偉強與馮德倫等導演組band，又笑說：「你主唱？你唔搵我去？」
■劉嘉玲以老闆娘身份陪章子怡傾偈，章子怡拿著叉邊傾邊食。
■嘉玲和千嬅在後台相遇，千嬅用手㩒肚自嘲之前太肥及胸細。
■梁洛施在後台叉腰整妝，獲三、四位工作人員服侍，十分架勢。
此外，章子怡接受訪問時擺架子，只願被電子傳媒訪問，惟問到有冇收電話短訊祝賀？還未提男友汪峰的名字，她答完有就黑面走人。至於出爐最佳導演王家衛談到偉仔失落影帝，他坦言：「有少少失望，可能金像獎唔想偉仔咁驕傲，想佢出多少少力。其實佢出咗好多力，可能大家對佢期望好大，但偉仔唔需要用獎證明自己，佢可以做自己想做嘅事。」快閃的偉仔沒有接受訪問，只託澤東說：「《一代宗師》拎咁多獎，等如自己攞獎一樣。」
採訪：陳辰、文國駿
攝影：朱志聰、潘冠恩、仇志德
|
鍾意就快D Share啦！
|
|
|
