2014年4月16日 星期三

內地評論勁彈港產片「冇好嘢揀」 只識懷舊同爆乳? BKD_S,




內地評論勁彈港產片「冇好嘢揀」 只識懷舊同爆乳?

2014-04-15 23:26:00



「第三十三屆香港電影金像獎」曲終人散,《一代宗師》勇奪12獎項成為大贏家,創下得獎紀錄,但相反有內地媒體對《一代宗師》一枝獨秀卻視為「一片獨大,盡顯荒蕪」,認為香港2013年港片產量只有42部,結果令金像獎選無可選。

內地新浪網以題為「金像獎失守多年 香港電影成圖騰」,花大篇幅,用4千多字嚟分析,講到香港業內有人建議將金像獎入門門檻提高,建議金像獎所設立嘅15個獎項中,香港人所佔工作崗位數量,由目前6個提升到10個,以求保護本土電影業;同時有批評指出,修改只會令合資格嘅香港電影愈來愈少,令金像獎固步自封。

該文章又指大贏家《一代宗師》嘅主演、編劇團隊來自內地,最佳攝影Philippe Le Sourd來自法國,最佳剪接、最佳音效嘅團隊都係中外融合,而王家衛口中嘅香港電影,其本質只係「混血兒」;高呼香港電影不死,其實只係香港電影人喺彷徨中自我鼓勵嘅精神圖騰。

其實日前內地傳媒有另文又以洋洋幾千字批評港產片「只剩情懷壓箱底」,仲借多位內地影評人把口,痛批港產片唔掂,如《殭屍》一片反映導演同觀眾只係識懷緬當年;《掃毒》同樣又係憑《誓要入刀山》串起全片,掀懷舊風抹不走當年《英雄本色》+《喋血街頭》嘅影子:「通過回憶過去拉攏受眾,這是發展停滯的港片目前獲得票房和口碑的捷徑,畢竟像往事乾杯的事兒,大家都會更加寬容。」香港人依家就連街頭小吃大排檔都保不住,乜嘢都被拆拆拆,難道就連集體回憶的權利也沒有?

篇文仲話:「《3D豪情》還在用『爆乳、擠奶、波霸』這樣的方式進行營銷,還有多少人對香港的三級片題材興趣濃鬱呢?」

其實港片產量不斷下降係不爭事實,至於是否因為2013年港片產量只有42部,就造就咗《一代宗師》成為大贏家,咁樣講似乎對《一代宗師》唔太公平,除非另外嗰41部全部都係垃圾。

香港係中西文化匯聚社會,自04年CEPA推出,中港連接關係更加密切,要搵一部電影,要台前幕後清一色係地道香港人包辦嘅,相信都幾難,咁樣將香港電影定性為「混血兒」亦好值得商榷。

香港電影不死,冇錯係一種精神信念,王家衛憑《一代宗師》踏上頒獎台接受最佳電影獎項時,王家衛話:「其實電影同功夫一樣,都係兩個字,信念。」拍一齣好嘅電影,相信係每個電影人嘅目標同理想,作為觀眾亦想入場睇嘅係好戲,不論電影「香港」、「唔香港」也好,大家都係想多啲好電影。



鍾意就快D Share啦!
Related Posts Plugin for WordPress, Blogger...