2014年4月16日 星期三

[FACE 360] 真愛 11年 蔡少芬認難頂 公開張晉肉麻情歌 張晉,蔡少芬,熱門,MF,




首次出戰金像獎,張晉由老婆蔡少芬拖實行紅地氈,做慣女主角的蔡少芬呢晚反而係配角,老公張晉先係主角。

封面

真愛 11年 蔡少芬認難頂 公開張晉肉麻情歌

「第 33屆香港電影金像獎」週日( 13日)舉行,《一代宗師》超班狂掃 12項大獎,其中張晉更憑「馬三」一角被封「最佳男配角」,擊敗大熱陳友同彭于晏。

首度提名就奪獎的張晉,上台領獎講得獎感受時恩愛多謝老婆蔡少芬,「有人說我這輩子都要靠她,我可以告訴大家,沒錯,我這輩子的幸福就是要靠她。」武指出身、又來自重慶,一直被外界以為他與蔡少芬的關係是女尊男卑,更認定他被老婆「食住」。實情張晉私下非常浪漫,婚後試過親自作廣東話 rap歌賀蔡少芬生日,更填埋詞表明奉獻全副身家畀老婆,「我靠的不是因為她得到工作,而是靠她得到生活上的幸福。」真愛 11年,冇收老公 50萬手袋、冇收百萬鑽戒,自認難頂,曾經滄海的蔡少芬先係最幸福。



其他影片: >>張晉威番次










被網友笑係「一代宗師綜合頒獎禮」的金像獎,全場最有驚喜唔係張家輝奪影帝,而係一直被笑是「蔡少芬老公」的張晉,奪「最佳男配角」時在上台說的「風雨同路」幸福宣言。

攞獎唔靠蔡少芬

「要感謝太太蔡少芬,有人說我這輩子都要靠她,我可以告訴大家,沒錯,我這輩子的幸福就是要靠她。」搞到一向硬淨的蔡少芬亦當場爆喊,激動過自己贏視後,人人羨慕蔡少芬嫁了個好男人。

張晉在後台及慶功宴上再三感謝老婆,於《一代宗師》慶功宴接受訪問時更強調事業上從未靠過對方,「就算我今天獲獎,一樣有人說我是靠蔡少芬的關係……我和她都是幕前的人,都逃不開說究竟誰在事業上做得比較好。可是我可以很自豪地說,我從來沒有用她的人際關係去接任何一個工作,這個是我和她最清楚的。她會那麼激動,因為覺得我是通過努力得到的。」

身家兩份使

張晉上台領獎,冇作狀谷淚、亦冇大發偉論,簡單幾句已經感動全場,更令見慣大場面的蔡少芬失控爆喊。

聽幸福宣言爆喊

錄 rap歌接老婆機

一直被形容為「蔡少芬老公」、甚至「窮武師」,今次終於吐氣揚眉的張晉,從未介意被形容女尊男卑,即使被笑食軟飯都可以當聽唔到,「之前很多人不知道我是誰,別人會說 Ada老公怎麼都靠著老婆,所以剛開始時我們故意不一起出現。當然,現在這種顧慮少了很多,畢竟自己的努力逐漸得到大家的認可。」

冇被閒言閒語幹擾之餘,張晉更肯花心思氹老婆開心。二人 08年 1月結婚,第二年蔡少芬生日,張晉竟然偷偷錄了一首廣東 rap歌,趁接老婆飛機時播,歌詞仲似足玩新郎時的肉麻宣言,「蔡少芬,我話你太天真,老公如果唔愛你,一早要結婚,分,分咩呀?分財產,我闔家財產就係你……。」雖然歌詞有啲奇怪,但勝在自己作,氹死老婆。

張晉 9歲開始習武,曾代表四川省於全國武術比賽奪多個大獎。 99年退役後加入袁和平的「袁家班」做替身及武指。他曾於訪問中提到當年連做一個「演員」的機會也沒有,「只有靠替身開始做起……我曾經在簡曆中把武術冠軍擦掉過。」 03年跟蔡少芬合作拍大陸劇《水月洞天》撻著。

91年選港姐奪季軍,被傳同劉鑾雄撻著,由阿姨(右)出面,為 18歲的她舉行百萬生日會,當年百萬已夠買豪宅。當日得富商愛錫,如今同老公張晉一齊仲生咗兩個女,幸福唔需要用錢衡量。

唔在乎被睇小

張晉同蔡少芬 09年接受《魯豫有約》訪問時,自爆曾向女方三度示愛,但頭兩次都被拒絕,直到第三次去酒店房表白,多次強調對愛情沒安全感的蔡少芬先答應拍拖,不過要有條件:「不拖手、不接吻、不公開」,連張晉都笑老婆似足古代人咁保守。同一個訪問,蔡少芬提起父母對張晉看法時更自覺其實好難頂,「我不管他們(父母)接不接受,因為他們都知道我的眼光,知道我已經成熟了,能跟我拍拖的那個男孩也不簡單,因為我挺難頂的。我覺得他(張晉)是一個很可靠的男孩子,可是我對自己沒信心,我怕會弄壞這段感情,因為我有太多太多的背景,讓我覺得感情是不可靠的。」拍拖 4年多,其間曾接受多次婚前輔導,感情大增,待男方信主後先結婚。

週一( 14日)下午張晉外出送老婆蔡少芬機後返家繼續湊女,曾被人冷言冷語,指他靠老婆,現在終於吐氣揚眉,張晉以平常心面對,「不嬲都有(被人認為靠老婆),由我同佢一齊開始已經有,我相信以後都會有,唔係話由嗰日(攞到金像獎)開始就會冇,都已習慣,我都唔會太在乎呢啲嘢。」

提到今次終於威番次,張晉並冇被勝利洗腦:「每樣嘢都係一個經歷,總之開心囉……由今日開始我都係朝早 6點起身送個女返學。」至於正飛返北京趕拍電影《大話神仙》的蔡少芬完成拍攝工作後就會趕返香港,跟老公張晉補祝攞金像獎。

張晉、蔡少芬二人成日開工分隔兩地,不過都會抽時間一齊湊仔,經常見到佢哋一家 4口行商場。《蘋果日報》圖片

攞咗獎嘅張晉翌日依然低調,送完老婆搭飛機,返到錦繡花園屋企接受本刊訪問時,提起多年來都被認為靠老婆,張晉表示不介意:「都已經習慣,我唔會太在乎呢啲嘢。」

張晉憑《一代宗師》內的馬三,擊敗網友熱選嘅陳友,奪得《最佳男配角》。老婆蔡少芬終於等到老公出頭,表現得仲開心過張晉。

男人的浪漫

39歲張晉與 40歲蔡少芬,於 03年初開始拍拖, 08年結婚,計落二人一起已 11年,其間張晉不斷炮製驚喜給老婆,雖然唔係送 50萬手袋或者百萬鑽戒,但已足夠令喺感情路上曾經滄海的蔡少芬感受到真正幸福。

自填廣東 rap詞

張晉話當年唔知送咩生日禮物,就上網搵咗啲音樂,再填啲詞錄低佢,蔡少芬當時聽完後勁讚老公有才華。

08年 1月,兩人拍拖 4年 7個月後正式結婚,蔡少芬話當時第一時間叫屋企大堂管理員改稱佢做「張太」。

心形燭陣求婚

兩人都唔著重物質生活,拍拖期間只會低調周圍旅行,更一直保持神秘,直至決定結婚才向傳媒公開拍拖甜蜜相。網上圖片

網上圖片

2千萬樓兩份揸

蔡少芬憑《甄嬛傳》升格為國內一綫紅星,內地劇幾乎收過百萬一套。 11年跟老公張晉聯名買入錦繡花園物業,上年轉為老公持有,現 Ada仍持有 2個物業,總市值近 2千萬,磚頭始終最穩陣。

《蘋果日報》圖片

碧濤花園

'07年買入$442萬

'10年賣出$550萬

賺$107萬

錦綉花園

'11年買入$707萬

現市值$750萬

張晉持有

《蘋果日報》圖片

凱旋門

'13年買入$1,200萬

現市值$1,171萬

蔡少芬持有

《蘋果日報》圖片

囍滙

'13年買入$756萬

現市值$800萬

蔡少芬持有

偉仔慶功飲悶酒

《一代宗師》破紀錄於金像獎連攞 12個大獎,遺憾曾 5度奪金像影帝的梁朝偉未能 6度封帝,慶功宴於偉仔老婆劉嘉玲投資的餐廳舉行,可惜偉仔未能盡主人家身份慶祝,全程匿埋飲悶酒。

《一代宗師》慶功宴於嘉玲有份投資嘅 Tapagria西班牙餐廳舉行,遺憾偉仔未能攞獎。反而焦點落咗喺張晉及章子怡等得獎者身上。

記者想搵偉仔做訪問,可惜偉仔婉拒仲不斷自隊紅酒。老婆嘉玲又忙住招呼章子怡,搞到偉仔好寂寞。

偉仔失落影帝,喺慶功影完大合照後,即刻閃入 VIP房,同班幕後吹水。

張家輝狂攬輸家古仔

金像獎除咗頒獎禮受注目,完騷慶功一樣精采。

偉仔失落影帝要飲紅酒解悶,但憑《激戰》再度奪得影帝嘅張家輝就相當風騷,完騷後到海港城意大利餐廳 Al Molo慶功,同粉絲不停合照。出爐影帝於餐廳內不時跟鄭中基、 Juno咬耳仔,同爭輸影帝古天樂攬曬頸傾偈,似係安慰對方。不過張家輝話:「古仔嚟賀我啫,佢邊使我安慰。(贏梁朝偉係咪特別開心?)唔係,我哋 5個都係好朋友,無論邊個攞獎都會戥對方高興。」

張家輝上年《大追捕》亦有提名影帝,可惜最後輸畀《寒戰》嘅梁家輝。今年以《激戰》程輝一角再攞影帝。

老婆關詠荷冇到場,家輝慶功玩到淩晨三點半左右就返歸,他表示冇因擊敗梁朝偉特別開心,仲話大家係好朋友。

張家輝喺慶功宴上滿場飛,其間亦開心到扯煙慶祝。

古仔爭輸畀好兄弟家輝,不過喺慶功上相當高興,更不時黐實張家輝互攬。

女友啜爆 Juno

Juno出席完惠英紅嘅慶功後,飲到面紅紅都去張家輝的慶功。以為佢單地拖到場,原來模界女友 Janine(戴庚玲),靜靜雞後門入,仲喺場內錫咗 Juno一啖添。

Baby衫靚表現差

Angelababy身穿 Zuhair Murad高級訂製晚裝,由好友馬天佑負責形象,仲同張家輝一齊攞最佳衣著獎勁搶鏡,但上台頒獎時就表現麻麻,頻食螺絲。

余文樂狂撩 Isabella

余文樂同梁洛施頒發「最佳男配角」一獎,喺台下樂仔亦不斷撩梁洛施咬耳仔,懶理坐喺隔籬嘅楊千嬅。

楊崢離奇慶功

紅地毯司儀楊崢,失驚無神現身《狂舞派》慶功,問佢點解到場又唔講,懶神秘。



鍾意就快D Share啦!
Related Posts Plugin for WordPress, Blogger...