上週三（ 9日），趁住有空檔，又南即到醫療中心覆診，不過心情唔錯，果然無債一身輕。
真面目
周身傷 父撤破產令 還清 750萬 捱殘又南睇骨科名醫
12年，黃又南和徐天佑重組 Shine後，演唱會、電影樣樣齊，最近兩子演出的話題電影《那夜淩晨，我坐上了旺角開往大埔的紅 van》上映，人氣翻熱。
曾孭起 750萬父債的黃又南，去年終於還清所有債務，其父亦於 10年成功解除破產令。無債一身輕，早年捱到周身傷嘅又南，終於有時間執番正副偈，原來尾龍骨和鎖骨出現移位，搞到要去陳方安生細佬方津生骨科名醫尋求醫治。又南，頭家靠曬你㗎！頂住呀！
03年，又南的父親黃文藻向銀行借下巨款，為當時的印刷工廠周轉，隨後無力支撐宣布破產，而作為擔保人的又南，當時才 20歲就孭起條數，為求盡快還清，就算身體出現問題，又南都一於懶理，咩戲都接，打戲更加唔用替身。
「我孭起頭家！」
11年，又南更在北京出席電影記者會期間，因疲勞過度而暈低。上週三（ 9日），又南揸車去到由陳方安生細佬方津生打骰的中環骨科診所，似是醫治過往拍戲帶來的舊患。週一又南對本刊說︰「之前拍打戲太唔錫身喇，尤其是拍《花花型警》同陳坤打嗰場，整傷咗尾龍骨，鎖骨又出現移位。」
至於其父向銀行借的 700萬，原來又南已於 09年還清，翌年父親亦解除破產令，當時還餘下大約 50萬街數。電話訪問中，又南再三澄清父親從來沒有欠下賭債，他說︰「其實好擔心老豆睇完會唔開心，仲叫阿媽收埋啲報紙雜誌，老豆的確係因生意出咗問題問銀行借錢，但從未試過欠賭債，當時借錢係我做擔保，我喺 09年已經還清接近 700萬，只剩番幾十萬街數！（有冇圈中人幫手？）我唔多圈內朋友，呢幾十萬真係要多謝我啲舊同學，上年亦已經還曬，我老豆亦都退咗休，𠵱家我同家姐兩個孭起頭家。」
又南：見到塊面都嚇親
短短 8年可以還清巨債，又南真係捱到殘，近年更出現皮膚敏感，但都要頂硬上到澳洲拍攝旅遊特輯，點知一輪日曬雨淋下，皮膚情況變得更加嚴重，連日的《紅 van》宣傳活動，又南都用厚粉遮去敏感斑點。又南說︰「已經好咗好多，我見到自己塊面都嚇親，呢排唔敢再曬住。」
《紅 van》 4日收 866萬多負評
陳果（小圖）執導的《那夜淩晨，我坐上了旺角開往大埔的紅 van》，未上先轟動，不過唔少網民睇完畀負評，個個都嫌同原著太大出入，後半部拖長來做，不過愈多人鬧就愈多人睇，票房 4日就 866萬（截至週日），睇錢份上，有幾多負評都唔驚
|
鍾意就快D Share啦！
|
|
|
