本月初筲箕灣花炮會，陳山聰同郭政鴻放下藝人包袱，擘大喉嚨打住鑼鼓，為自己的舞獅團隊出場壯勢，引來街坊圍觀狂影。
探熱針
撈過界 陳山聰郭政鴻 秘撈做舞獅
做賭王快婿夢碎，同何超雲玩完的「四失聰」陳山聰，潛水一年有多洗底，直到最近減肥成功，才重操故業返無綫拍新劇《官場浮世繪》。重新出發，陳山聰更撈過界，孖住死黨郭政鴻，組成舞獅團隊「獅兄弟」四出表演，舞出另類財路。
有板有眼
經歷失「雲」事件，痛定思痛的陳山聰決定還原基本步，返無綫拍劇、減肥跑馬拉松，甚至連舞獅都做埋。早前佛誕，陳山聰跟老死郭政鴻，率領由他們成立的舞獅團隊「獅兄弟」，為筲箕灣區的花炮會演出。
當日戴住黑超的陳山聰負責做鼓手，替準備出場舞獅頭的郭政鴻造勢。龍虎武師出身，有功夫根底的郭政鴻，騎膊馬舞獅頭跳樁演出，無難度。反而形象一向「二世祖」的陳山聰，打完鑼鼓轉位跳上師弟肩膊，同郭政鴻一齊舞獅頭較量，功架居然唔輸蝕。
籌備展覽
兄弟班上陣，加上明星效應，附近睇熱鬧班街坊，個個高舉手機狂影。「政鴻之前有幫台慶同東華籌款舞獅，反而山聰識呢瓣，真係無乜人知。聽講佢啱啱過身嘅老豆當年喺澳門做體育會會長，學過功夫，所以山聰自細跟老豆學過舞獅，只係入咗行之後，無機會俾佢露兩手。」舞獅界人士透露。
據悉「獅兄弟」自今年初正式成立，郭政鴻與陳山聰已多次拍住上公開表演，因身手好加上有知名度，不少公司主動搵上門邀請演出。無綫出名人工奀，以為兩兄弟搞「獅兄弟」純粹為賺外快，點知佢哋推 job多過接 job。
「咁多生意送上門，班朋友都勸政鴻同山聰不如當一盤生意咁做，但佢兩個堅持搞呢壇嘢，係為藝術做推廣，主力響大型活動先出手，例如一年一度花炮會、觀音誕之類，商演、開張唔會接，除非係老友開公司，先會破例幫手。聽講佢哋籌備緊一個關於獅藝嘅展覽，目的係唔想造獅頭呢門藝術失傳，寧願花更多時間做推廣。」知情者說。
兄弟幫
陳山聰、郭政鴻拍住上搵食，有福同享，圈中亦有唔少兄弟幫，夾份搞生意開發另類財路。
|
鍾意就快D Share啦！
|
|
|
