掃呢頁CODE去手機

2015年4月7日 星期二

吳若希開心晒:阿媽醒番啦! 吳若希,

昨日,吳若希如常探望母親,並向記者公布好消息。

吳若希開心晒:阿媽醒番

人氣歌手吳若希(Jinny)的母親上月28日炒單車爆頭昏迷,留院十日期間,孝順女Jinny每日準時到醫院探望母親,雖然期間一度因母親病情未有明顯好轉而失控爆喊及「短暫失憶」,幸Jinny終孝感動天,昨日報喜指媽媽已經甦醒,而且眼仔睩睩與家人互動,並上載兩母女的握手照,認真「手」得雲開見月明!

吳若希(Jinny)母親上月尾踩單車時失控而撞壆爆頭重創,在深切治療部(ICU)留院十日期間,Jinny的心情如坐過山車般大起大落,由最初在醫院擔心爆喊,到抱樂觀心態,再之後愁爆謂母親或要做小手術幫助呼吸,到前晚更表現失魂!昨日,「幸運之神」終於眷顧Jinny,吳母病情大躍進!

未知視力有否影響

孝順女Jinny昨日一如以往於下午五時半左右帶細佬來到ICU探母,母親男友黃先生則先於5時15分到達。約7時20分,探病後的Jinny神態輕鬆地步出病房,與之前愁爆的她截然不同!談到母親現時狀況,Jinny開心表示母親進展很大,甚至可以擘大眼:「佢依家可以望到每一位,同佢講嘢都有反應,都做到啲握實拳頭同向左右望嘅動作,依家醒番好多問題都解決到,一直好轉緊。媽咪之前整傷左邊眼,但都要等進展再大啲先可以check到隻眼視力有冇事。」她又透露媽咪睜得開眼令她十分感觸:「因為日日自言自語咗咁耐,feel到自己講嘢原來有用,我讀晒啲人寫嘅嘢畀佢聽,Sisley(蔡思貝)仲話要請媽咪飲茶,媽咪聽到都有笑,進步好大!」

吳母男友黃先生昨獨自到達醫院。
  • 吳母男友黃先生昨獨自到達醫院。
吳若希在Instagram公布好消息,並上載與母親互握的照片。
  • 吳若希在Instagram公布好消息,並上載與母親互握的照片。
吳若希與母親母女情深,自母親出事以來,吳若希每日也如坐針氈。
  • 吳若希與母親母女情深,自母親出事以來,吳若希每日也如坐針氈。

掹呼吸喉免做手術

Jinny續謂昨天沒有見到醫生:「不過護士話如果有反應,就可以試下掹一啲呼吸喉,嗰個小手術因為依家清醒咗就可以唔使做。」她又稱如果媽媽拔了呼吸喉後,再過數日沒事的話便可離開ICU:「但見完醫生先知,佢依家嘅甦醒程度得3至4度(昏迷指數),要5度或以上先叫清醒,所以佢依家要再清醒多半度先得。(媽咪有冇試吓講嘢?)佢仲插緊喉,佢有諗過掹開支喉,但畀我哋阻止。」她又大讚細佬很叻:「佢好盡力做好自己,好appreciate佢。(自己仲撐唔撐得住?)我盡量keep住身體健康。」問吳母病情好轉會否考慮轉院?她說:「因為呢度嘅腦科比較勁,而且有跟開嘅醫生,服務又好。」之後她又提到前兩日自己心情不佳的原因:「因為隔籬床(嘅病人)同媽咪同日入嚟,但好快就好番,所以自己好羨慕。」

Jinny之後亦隨即在Instagram公布好消息,上載與母親互握的照片,並留言:「醒來就好了。」至於好友Kellyjackie(KJ)昨天亦有探吳母,她透露會抽時間陪伴及開解Jinny,問她覺得Jinny能否撐住?她大讚對方硬淨,自己亦不介意擔任聆聽者。

吳若希接受傳媒追訪,心情大好。
  • 吳若希接受傳媒追訪,心情大好。
吳若希大讚弟弟的表現令她感欣慰。
  • 吳若希大讚弟弟的表現令她感欣慰。
Kellyjackie(右)稱會抽時間陪伴好友。
  • Kellyjackie(右)稱會抽時間陪伴好友。

文:音樂組

攝:鄭家俊

鍾意就快D Share啦!