無綫前主播周嘉儀，之前同另一個主播林小珍撐到行，林小珍仲上網怒插周嘉儀添。不過呢啲負面消息都無阻周嘉儀心情靚靚返新工。
周嘉儀日前去到一間證券行做市場拓展聯席董事，返新工唔單止薪高糧準，佢仲話新公司冇人講是非喎！咁講法，即係明寸無綫新聞部是非多啫。
周嘉儀接受傳媒訪問時話，每個地方都有是非係好正常，佢做主播咁多年，點都遇到啱傾嘅同事，但就冇提到佢同邊個啱傾啦。講到份新工，周嘉儀話依家工作環境好，同事又好，仲會一齊開P，食飯添。佢仲話依家同同事喺一條team冇閒話，而以前嘅是非就唔理啦。
被問到遲吓會唔會再出嚟同觀眾見面，周嘉儀就話新公司可能會做一啲金融方面嘅節目，佢可能會幫手做吓主持或者司儀咁喎！
