2015年8月17日 星期一

陳曉東外父相 兩年抱兩女 陳曉東,



陳曉東外父相 兩年抱兩女



其他影片:>>






停工陪老婆入產房剪臍帶 陳曉東兩年抱兩女

現年39歲的陳曉東近年密密造人,去年初與27歲的台灣嫩妻王妤嫻奉女成婚,13個月內連中兩元,昨日在微博宣佈陳家第二位千金出世。東東挑戰速度極限,昨自爆被老婆投訴生得太密,他笑說:「我老婆話要罷一罷工先,生到有啲驚。」今胎都是女,東東表示不介意被指外父相,強調仔女都咁鍾意,唔急追仔。

陳曉東與張栢芝分手後,身邊女伴如走馬看花,至去年才鎖定目標,與年輕12年的台灣護士王妤嫻拍拖短短一年便拉埋天窗。東東和王妤嫻由結婚到生B,速度快過火箭。去年2月結婚,7月誕下女兒芷霖(暱稱朵朵)。轉眼間,朵朵上月剛滿一歲,東東昨早又在微博公佈,太太前日在台灣馬偕醫院誕下約7磅半B女,意味着老婆是坐完月即再懷孕,東東認真精力旺盛。



■陳曉東太太王妤嫻前日誕下次女,剛出世的BB經媽媽的協助,向鏡頭揮手。

追仔順其自然

東東在微博貼上照片並留言:「8月15日,小女兒報到!獅子座,爸爸媽媽會愛你,謝謝大家,平安。」相中王妤嫻抱住初生女兒,母女心心眼對望,甜蜜滿瀉。王妤嫻亦有轉發該留言:「感謝大家的關心與祝福,辛苦爸爸(陳曉東)的陪產。」好多人都關心,東東連生兩胎都是女,是否想追多個仔?昨日東東接受記者電話訪問時說:「冇冇冇,我屋企完全冇呢啲壓力,順其自然啦。老婆話要罷一罷工先呀,話生到有啲驚,所以冇確定話一定要追,或確定話一定唔追,但有就最好無論男女都好,又唔一定要追個仔,我都好鍾意女㗎,女好嗲。」他還笑言不介意被指是「外父相」,再三強調不一定要追仔:「哈哈,順其自然啦,唔使錢養咩!」



■陳曉東抱着約7磅半的細女,一臉慈父樣。



■東東再次陪老婆入產房生B,還親自剪臍帶。



■王妤嫻抱住剛出世的囡囡,母女心心眼對望。微博圖片

上次大女朵朵出世時,東東有入產房,但無份剪臍帶,所以今次他主動要求醫生給他剪,東東說:「兩個女嘅臍帶同臍帶血都有保留,細女未改名。但我份人迷信,自己屬兔,同今胎羊B好夾,之前仲叫咗師傅擇好日子,擇咗噚日(前日),點知老婆就順產,兩胎都順產,估唔到老婆咁好氣力。」有說獅子座的孩子性格剛烈,但東東卻指這個女好文靜:「喺媽咪個肚嗰時都係,屬溫文儒雅嗰類;反而大女就紮紮跳,一出嚟就擰頭擰髻,好醒目好有霸氣,遇到唔滿意就『哎吔哎吔』同人嗌交。」

留台陪妻坐月

朵朵現居北京由嫲嫲照顧,至今仍未知道妹妹已出世,問可擔心大女會呷醋?東東說:「都要教,小朋友突然間多咗個妹妹,要教佢錫妹妹同識得分享,如有玩具要借畀細妹玩。但我諗暫時都要保持適當距離,因為小朋友乜都唔知,驚佢好大力咁拍落個頭就唔好,要教佢輕輕地咁錫。」



■東東的大女朵朵上月剛滿一歲,現在已做姐姐。資料圖片



■陳曉東表示要教識朵朵與人分享。微博圖片

除了錫囡囡,東東亦好照顧老婆,一早將手頭工作暫停,專登飛台灣陪老婆入產房生B,他說:「我肯定會陪坐月,喺醫院住多兩、三日就會轉去月子中心,已經訂好晒。」兩姊妹為何都選擇在台灣出世?他說:「因為太太係護士,同馬偕醫院嘅黃醫生好熟,所有嘢都安排得好好,由佢接生老婆會有信心啲,所以揀喺台灣生。喺台灣坐完月之後,我哋會經香港幫囡囡辦證件,然後再返北京。」

採訪:小米

鍾意就快D Share啦!
Related Posts Plugin for WordPress, Blogger...