掃呢頁CODE去手機

2015年9月30日 星期三

退隱 11年復出開咪 梅小惠:人生最大挫折係只戀過一次! [FACE - 436 - 專訪] 梅小惠,MF,



真人騷

退隱 11年復出開咪 梅小惠:人生最大挫折係只戀過一次!

梅小惠的訪問,從兩個月前未播《他來自江湖》已經開始約,可惜不論報紙雜誌,她一概拒絕,話唔做就唔做……還以為,她實在怕記者又問起舊愛曾偉權。

直到梅小惠復出商台 881為新節目《月光光呵呵呵》開咪,經電台再約,小惠答應了,條件是一定要和主持拍檔梁泰來(左)、鄔家麟(右)一齊受訪,佢話:「學似萬梓良話齋,我哋三個人一條命㗎( 92年大台直播婚禮,萬梓良曾經話過同恬妞、繼女三個人一條命,結果婚姻維持僅僅四年)!嘩哈哈……」

久違了的招牌馬笑終於等到了,而曾偉權亦都照提不誤:「好多人以為我最傷係當年拍拖十三年分手,其實我覺得我人生最挫折係成世人淨係拍得嗰一次拖……係囉!點解唔試多幾個?你估我唔想㗎!」

我就知道,小惠不肯做單人訪問絕對不是想潤萬梓良咁簡單,真正原因,她說:「我𠵱家身份唔同,電話訪問同大家集體回憶下無所謂,但係賣個人情做單訪,無謂啲記者覺得欠咗我,第時遇着我啲嘢唔寫好都唔得!」

是的,自從 04年完成了最後一套大台劇《皆大歡喜》,梅小惠已經轉行自組公司做了品牌顧問 11年,當將近半百( 49歲)的她,遇上 40+的梁泰來和 30+的鄔家麟,她說讓她想起了自己樣樣美滿當時得令的三十歲,和失戀喪父意志最消沉的四十歲,因此更珍惜更愉快的享受自己的五十歲:「所以話叫我做呢個節目去呵人最適合不過,因為得我可以話俾你聽,點解跌碰完要快啲企番起身,因為得我除咗識氹人開心,最叻係氹自己開心!」

把聲復出,個樣冇諗過復出

小惠,你有幾耐冇做專訪?

十幾年喇,我仲記得我最後一個專訪係《明周》,我嗰陣時已經開始做緊幕後……諗落個專訪都好論盡,又要化妝、又要挨落個石牆度擺 pose,真係論論盡盡。

淡出 11年,唔使化妝唔使擺 pose係唔係當堂輕鬆晒呢?

就算我唔係一個靚女,出到嚟做訪問都要盡忠職守化妝、都要交功課㗎,呢個係我個位置。十幾年冇做,過去兩個星期開咪,見多咗記者,開始返番嚟,開始慣咗啲。你話啲戲癮係唔係完全無,其實每個人都有自己角色做緊,我每日都做緊戲,但係階段唔同,我𠵱家做緊嘅戲唔需要有咁大反應。

點解會復出開咪?會促成《月光光呵呵呵》呢次合作呢?

係商台 creative director Wasabi想做一個正能量、瞓覺前呻走啲寃鬱氣嘅節目,佢同梁泰來講個節目搵到梅小惠就好笑喇……咁梁泰來同我熟啲,大家都做公關,佢諗住我一定會推……嗰陣時未做《他來自江湖》,傳會做啫,我屋企人已經告誡我:「唔該你出街化下妝喇!套劇一出,周街都係相機,一定好多人話捕獲梅小惠㗎!」嗰陣時我已經立定決心,任何訪問都唔會做,除咗電話訪問……

點解淨係做電話訪問?

套劇(《他來自江湖》)我有份,我都係一個演員,點都要支持下,話晒都係一個集體回憶,但係靚一靚影四七面嗰啲就唔好喇…… sorry,計錯數,係三七至啱。點解唔做?因為每個人做嘢都有一個階段,我放棄幕前係做緊啲我自己鍾意嘅嘢。針冇兩頭利,一定要專注, Terry(梁泰來)搵我時,我賣口乖,話第一次都要推靚仔……但係佢同我講唔係專訪,係想搵我做主持,嗱嗱聲唔 WhatsApp,打俾佢問下咩事。其實電視 keep住有搵我,電台真係第一次搵我,尤其係商台,嚴選 DJ、唔係話紅就搵你,基於八卦就傾喇。幾得意㗎,我哋三個主持六十後、七十後、八十後。有一次仲邪,我做第二個節目,三個都係(屬)馬,我仲要係大馬添!

點解死唔肯做個人專訪?

第一,我哋要做就三個人一齊做,萬梓良嗰啲呢,三個人一條命……嘩哈哈……第二,因為我𠵱家正職係公關,同記者合作得好好,我唔想俾機會自己去利用記者……唔想我應承得你訪問,唔該你第時做我啲嘢就寫好啲,好似欠咗我啲咩咁。

三個都屬馬(之前的節目),你一大就大一輪,有冇好嬲?

我又唔嬲喎,你哋嗰啲八十後,個樣仲蒼老過我……嘩哈哈……反而覺得我喺度享受緊生活,八十後嗰個鄔家倫啱啱至「啤」咗個小朋友出嚟,仲拼搏緊!咁又唔係上晒岸,叫做點都唔會浸死囉……

其實前度係曾志偉,唔係曾蔭權

真係?去到 49歲,見過咁多嘢,你係覺得自己點都唔會浸死?

點會浸死啫?個人唔貪,識得自量,點會似十幾歲咁:係呀!要跳樓呀?好吖,我做!我唔係嗰個年代,唔係嗰個心態,唔係話錫身,係識得錫自己,會做啲舒舒服服嘅嘢,唔會玩另類……但係另一個主持鄔家倫覺得我另類,因為我係佢哋兒時嘅幻像,以為我就係大癲大肺、冇煩惱嗰啲人,當佢知道我同大家都一樣,原來都有嘢諗,佢哋就會話我另類。

其他兩位主持話人人都有嘢谷氣、有壓力,不過做節目時係你冇嘢谷氣?

作狀得一時,唔作狀得一世,我真係冇,真係樂觀喎,再大件事我都好易過。其實咩事都係,換個角度睇就會好大改變。點解要搵錢呢?唔係話亂咁 fing,就係唔想就住使;點解要減肥呢?就係為咗食多啲……唔再係為上鏡,係太飽頂住食唔落,再食多啲咋嘛!

見到呢兩位 70後同 80後嘅拍檔,有冇令你想起十年、二十年前嘅自己?

我喺梁泰來嘅年紀,即係三十尾四十頭,就係我最開竅最生性嘅時候。因為我嗰個年紀,三十尾時經歷得最多:先係結束咗一段感情,爹哋又走咗啦,拍劇開始覺得我都唔開心,點樣可以帶俾觀眾開心呢……我無氣餒當時,反而係去咗搵自己其他潛能,同學下新嘢。我怕水、怕快、又怕高,仲要唔識游水添……我個人比較慳儉,想一隻雞蛋可以達成三個願望,跟住我就去咗學滑水。至於三字頭時,就係拍拖、當時得令、總之各樣都好好。

人生最挫折,淨係戀過一次

三十歲時好想有個家庭?

我唔係三十想,係十幾歲已經想要自己嘅家。(梁泰來:同曾蔭權?)唔係,同曾志偉!哈哈……十幾歲時我最想有個童話式婚禮、想有小朋友,仲算命算到自己有孖胎……點知俾人孖都輪唔到自己孖。啱嘅時間做啱嘅嘢,過咗去強求唔到。

好多喜劇演員,面嗰浸好歡樂,實情唔係,好似 Robbie Williams、好似周星馳,睇落你又真係表裡如一咁歡樂喎!

我真係好歡樂,識得帶歡樂俾人,亦都識得帶歡樂俾自己,我好感恩有呢個性格,亦都因為跌碰過……因為跌碰過,我知道要起身得快,越係快起身越係可以走前啲,但係都唔代表就要忘記過去,過去都有佢值得存在嘅意義。

過咗去就講得輕鬆,但當其時咁多樣嘢加埋一齊,應該都唔容易起番身?

都要時間,因為我係小公主嚟㗎,溫室長大,單純到嘔,有爹哋媽咪錫、有家姐照顧,七兄弟姐妹我排尾二,細妹仲強壯過我,真係咩都唔識。諗番轉頭,啲挫折其實好小事。講真,情變算得咩挫折,我覺得我最大挫折係成世人淨係得一段愛情,呢個至係人生最挫折!

人生最挫折,淨係戀愛過一次

係囉,點解唔試多幾個?

你估我唔想㗎?我諗因為我專注咗其他嘢,亦因為太多人都知,我對之前嗰段愛情太專注,啲男仔驚我專注嗰頭:「佢之前嗰段十幾年,仲唔係受咗好大傷害?我仲唔係要出好多力?」一咁諗,啲人仲唔走吖?

真係冇人埋過身?

有,咪埋身叫我介紹第二個俾佢囉:「喂,江欣燕咪啱啱離婚嘅?你可唔可以介紹佢俾我識呀?」我問番江欣燕,有冇人托佢介紹想識梅小惠……真係冇囉……喺別人眼中,我最傷都係感情結束。亦都真係嘅,當其時係分手在先,一年之內至到爹哋離開。到我爹哋離開,我先至知爹哋最重要。

拍咗拖幾耐分手?

十三年,我哋呢啲人唔係好識面對,覺得身邊啲人面口唔同咗,個個都小心翼翼照顧我感覺,叫杯咖啡啫:「唔好喇,你飲杯甜嘢」同埋最大得益,我成世人都未試過 under一百磅,當其時最瘦去到 98磅,選健美小姐都 102磅同埋,見到好多真正嘅朋友,個個都話叫我出街,個個都好為我……嗰陣時阮兆祥直情搬咗嚟我隔籬住,住咗入去至同我講,佢好好,叫我瞓唔着去搵佢,我真係一個星期有六晚會過去敲佢門,跟住我瞓床、佢瞓出邊梳化。

點解要敲佢門?

因為唔想一個人囉!我發覺一樣嘢,當遇到呢啲嘢,真係唔好一個人鑽牛角尖,當身邊有個人俾你發洩、俾你任性,包保你一定唔會行錯。

其實阮兆祥有冇追過你?佢女朋友係唔係好憎你?

佢肯定係愛我嘅,如果真係計,佢係唯一一個我飛過嘅人……嘩哈哈……佢女朋友憎到我死!其實我哋真係冇嘢,仲一齊去睇劉嘉玲嗰個舞台劇《百老滙》添……(其實係《杜老誌》囉!)

跟住幾耐爸爸出事?

未夠一年,爸爸心臟病,好快嚟好快走冇乜痛楚……佢走咗我至同我家姐講,老竇都幾識揀時間,佢走咗第二日,就沙士封醫院。我哋喺 CEO陪佢走過最後一程……(其實係 ICU唔係 CEO囉!)

你覺得人死咗去咗邊?

梗係去咗天堂啦我老竇,佢應該起定間屋等緊我入去住……人死咗去邊唔重要,重要嘅係後人嘅心去咗邊。佢喺邊我哋唔會知,就算知又代表啲乜?可以改變到乜?

我想問曾偉權到底係唔係有咗第二個至飛你?

嗰陣時新聞係咁寫,但每個人都有自己選擇,我哋如果冇問題出現,亦都唔會有第三個人走入嚟。我喺當時已經識諗,打後更加肯定,我唔會接受到一隻碎咗嘅玻璃杯黐番埋佢扮冇事、繼續用。就算裝到水,都始終有裂痕。

笑聲聽下!

我做過梅小惠個老死阮兆祥,亦都做過當時得令嘅王祖藍專訪,喜劇演員最淒涼莫過於收咗工都唔做得自己,去到邊都遇着街坊要求:「講個笑話嚟聽下!」講唔出、唔好笑?即係大支嘢、巴之閉囉!

同樣的,一見面,攝影師也叫梅小惠:「俾個招牌馬笑嚟聽下!」小惠當堂拒絕:「夾硬嚟我笑唔出喎!」其實整個訪問,該笑的時候就笑,次次童叟無欺似足隻馬,真係仲好笑過個笑話本身。真係好治癒,真係令我有衝動夜晚扭開電台,去俾梅小惠呵一呵。

梁泰來!

梅小惠!

鄔家麟!

撰文:朱小博

攝影:范仲良

鍾意就快D Share啦!