今晚坤哥吳業坤到君悅出席所屬公司星娛樂高層Tommy Chu嘅婚宴，雖然因為拍《愛‧回家2》而遲大到，但甫到場即搶盡風頭，唔止成為集郵對象，成班老闆包括二少薛嘉麟同佢老婆諸葛紫岐、大薛生薛濟傑等都出嚟同坤哥合照，又恭喜佢噚晚喺叱咤連掃三獎。令婚宴好似變咗慶功宴咁，驚唔驚俾人話搶fo？坤哥即話唔敢當:「Tommy好錫我，佢講笑話幫我慶功啫。」又話感激薛生好錫佢，好照顧佢。咁星娛樂係咪捧佢做一哥？佢就話:「我仲未聽過呢個計劃，不過公司會幫我開一個個音樂會，依家儲緊歌，2016年要發力追，仲會出碟。喺呢個年代仲出到碟，真係好感恩。預計都有八至十隻歌。」有份到賀嘅欣宜就話佢封咗封大利是俾一對新人，至於會否搶花球呢？佢就話:「都唔知搶咗未，而且我都未有男朋友。」欣宜又謂今晚只係飲咗少少，酒量一般。有冇試過酒後鬧事？欣宜話:「有醉過，但冇鬧事嘅。試過有次同同學仔去舞會，飲醉咗，返到屋企，要個細粒過我嘅朋友孭我行樓梯上樓，呢個係我真正嘅好朋友，到依家仲係好好朋友。」以身相許？「嫁俾佢？唔得!」
| (攝影：仇志德) |  |  婚宴好似變咗慶功宴咁。 |
 成班老闆出嚟同坤哥合照。 |  |  欣宜就話佢封咗封大利是俾一對新人。 |
來源 source: http://hk.apple.nextmedia.com
|
鍾意就快D Share啦！
|
|
|
