黃秋生一鋪清袋陷抑鬱邊緣
一向「天不怕、地不怕」的黃秋生去年被迫幾近絕迹影壇，幸而天無絕人之路，電視劇《梟雄》令他「成功反擊」並成為香港演藝史上第一個摘下「大滿貫」的人，認真飲得杯落﹗回顧接近沒有電影拍的日子，這位視帝自爆曾因此陷抑鬱邊緣，直言因連串是非而差點「遇溺」，還說：「如果呢個唔係黃秋生，有冇諗過分分鐘死得人呀？」
現年54歲的黃秋生經歷過種種風浪，去年其言論捲入政治風波，搞到在內地無電影開「坐冷板櫈」，即使港產片亦只得客串的份兒：「起初都預計到會有咁嘅結果，好似一下子摧毀晒我多年累積落嚟嘅嘢咁，覺得自己好抑鬱。其實內地由始至終都冇封殺過我，係電影投資者驚有變化，唔敢搵我啫。（睇心理醫生？）咁又冇諗過喎，我同自己講唔可以沉落去，直至上個月突然間開咗竅，個人仲開心咗。以前照鏡覺得黃秋生好乞人憎，依家望落個樣慈祥咗，仲識得笑添。」
他不禁斥責當日造謠生事者：「如果呢個唔係黃秋生，有冇諗過分分鐘都死得人？搞到人跳樓自殺呀？」對於一直被指他有政治立場，秋生坦言：「我一向冇呢方面嘅立場，我中立，對事唔對人，警察啱嘅事我都撐警察，只係有啲人心裏面一早有界線，用嚟釐定我啫。」
內心變得強大
驀然回首，秋生覺得這次「無妄之災」卻反令自己「賺咗」：「內心變得更強大，發現多咗好多朋友，拍《梟雄》又有獎攞。呢次（視帝）真係好開心，『大滿貫』（影、視、舞台劇界先後稱帝）喎，拍得住Benedict Cumberbatch，佢就連勳章都攞埋，等我遲啲拍套戲去康城參展，可能攞埋騎士勳章就very good喇。」
談到早前內地排山倒海的負面報道，秋生更自嘲：「都係好事嚟，如果你冇價值，搵鬼去寫你咩？即係我仲有價值啦。我成日都話要做到有周潤發嘅魅力、任達華嘅隨和、同鄭少秋嘅優雅，咁就冇得頂，依家有人走埋嚟搵我影相，即刻（舌累）飯應啦。」
有意再執導筒
問到秋生勇奪視帝後，是否多了劇本送上門來，他卻坦言：「又冇喎，冇呃你嘅，只係嚟緊會同邱禮濤合作，開我哋嘅最後一套驚慄電影。其實即使好似之前咁冇電影拍，我都有舞台劇要做，有廣告要拍，有好多會要開。（再同無綫合作？）初步傾過，都要等人哋寫好劇本先，今次一定係時裝，仲要喺香港拍，唔好搞咁多嘢嘞。」秋生又透露稍後有意再執導演筒，將舞台劇劇本改編搬上大銀幕：「個古仔係講兩個殺手嘅，有同楊生（經理人公司老闆楊受成）講過，不過都要等我寫好劇本先。演員方面我想搵白只同林雪，仲有阿一（布偉傑），點解外籍演員唔可以喺港產片擔正呀？」
秋生形容自己仍在追夢，談到未來的大計，他滔滔不絕：「可能性仲有好多，好似想將自己嘅劇團變成香港嘅品牌，大家會嚟香港睇我嘅舞台劇。寫書、教書、或者去電台開咪做節目都得，我份人坐唔定嘛。」
文：影視組
|
鍾意就快D Share啦！
|
|
|
