現年37歲嘅索腿天后陳敏之，2014年10月1號同拍拖10年嘅圈外男友雷偉信（William）喺峇里白色小教堂行禮。婚後兩年唔夠，索腿天后今午三點左右宣佈有喜喇！相中身穿露肩鬆身衫嘅敏之雙手護肚，向天微笑，一臉感恩之情。見其腹部都幾大，似乎唔止有咗三個月喇喎！敏之喺instagram同facebook公佈喜訊，話自己將榮升為人母：「A baby is a blessing! Thank you God for this amazing gift from heaven above, a precious little prince to cherish and to love. 」，好多網民見到都留言恭喜佢。據知敏之日前剪頭髮時，都已經忍唔住同人講自己快做媽媽。今年三月，敏之坦言已積極造人：「去到呢個年紀，時間過得快，就嚟又生日咁，懷孕係得嗰幾年之嘛。」又話暫時想生一個，希望快啲搞掂，估唔到話口未完已經中獎！敏之接受傳媒訪問時，開心地謂﹕「我同老公仲有屋企人都好開心，覺得係神畀我哋嘅禮物，想咗好耐，都係順其自然，因為我哋都好忙。」原來揀7月1日宣佈呢件喜事係有原因，敏之解釋﹕「我同老公都想趁7月1日放假日子宣佈，加上今日係伍姑娘(伍詠薇)結婚17周年，喺我哋家族叫雙喜臨門，因為都係喜事。」伍姑娘係敏之契姐，咁敏之嘅囝囝將來就會叫伍姑娘做「大姨媽」，敏之哈哈笑道﹕「佢鬧我呀，叫我個仔唔可以叫佢做『大姨媽』，成塊『姨媽巾』咁核突，話要叫佢做Auntie Five。叫Auntie Five係冇問題，但佢真係我個仔嘅大姨媽，哈哈！」敏之透露懷孕初期有害喜徵兆，但依家已經好咗好多，佢話﹕「初時都有啲食慾不振、作嘔同眼瞓，仲瘦過未陀BB之前，不過依家穩定咗，已經可以食番嘢，不過醫生都話唔好過肥。」敏之話唔會全面停工，噚日仲有做《Sunday好戲王》主持，問老公有冇送禮物作獎勵？佢話﹕「暫時未，但原來有咗真係可以做皇后，好多人錫，禮物唔使送，最重要有愛、開心同正能量。」
|
鍾意就快D Share啦！
|
|
|
