一聽到港女呢兩個字，唔少男士聞風色變，直情想離港女有咁遠得咁遠，皆因佢哋拜金至上又嘈嘈閉，難怪男士們都怕怕！不過，男人心一樣海底針，明明唔鍾意港女，轉過頭又Like爆賴慰玲喺無綫劇《殭》嘅港女角色，認真「口裏說不，身體卻很誠實」！而最近有人向賴慰玲「挑機」，勢要將港女性格表現得更淋漓盡致，網友同樣勁Buy呀！
網友勁想摑佢
講緊嘅咪係索爆人妻「長腳蟹」呂慧儀囉！近期話題劇集《一屋老友記》，當中佢飾演過氣𡃁模，份人有公主病兼相當拜金，唔單止一見到名牌就「心心眼」，仲由細到大都立志嫁「富二代」，想過幸福少奶奶生活，點知最後都係嫁個做打工仔嘅老公，所以成日嫌老公唔爭氣，超惡頂喎！劇中「長腳蟹」性格仲鬼咁潑辣，經常同滕麗名（阿滕）鬥氣嘈交，總之咩都嘈一餐，有網友更入戲太深，揚言想摑巴「長腳蟹」，咪證明佢真係好好戲先演得咁真囉，抵佢揮低賴慰玲做港女代言人！
最佳女配角大熱之選
而日前播出嘅一集，身為減肥產品代言人嘅「長腳蟹」，竟然因為太為食而肥咗十磅，雖然橫睇掂睇佢都好弗，不過客串做產品老闆嘅安德尊勁不滿，要告佢毀約兼賠錢，「長腳蟹」即場執生扮大肚，仲𢱑多個孕婦用嘅產品代言返嚟，場面爆笑！最搞笑嘅係「長腳蟹」恃住「大肚」，要風得風、要雨得雨，係咁點阿滕做阿四，一時要佢執屋掃地，一時又要佢親手洗Bra，之後仲用一連串又長又毒嘅說話鬧爆阿滕，引到一班網友睇到笑晒兼標晒眼水，仲話要力推佢攞女配𠻹！
網民有話兒：
DORA_KUXXX：見到佢執生扮大肚，仲要係咁點人做野（嘢），笑到我標眼水！
LXXXFung：長腳蟹係（喺）入面堅港女，勁拜金又成日嘈生晒，真係想摑佢一巴。
XXXBESON：長腳蟹仲港女過賴慰玲《殭》個角色喎！
CarrieXXX：睇長腳蟹同滕麗名成日鬥氣好好笑，咩都嘈一餐。
KWONGXXXFUNG：推到長腳蟹攞女配！
|
鍾意就快D Share啦！
|
|
|
