朱慧敏舊年狠撇被爆偷食嘅舊愛前組合EO2成員彭懷安（Eddie），兩人口口聲聲話只保持合作經營冰室嘅生意夥伴關係，但其實佢哋喺宣佈分手前，已不斷傳復合消息，Eddie隻手受傷入院，朱慧敏更飛撲去院探望，分手似乎欲斷難斷，仲有傳佢哋其實係假分手㖭，不過兩人就強調堅．分手。兩人離離合合峰迴路轉，噚晚就被本報讀者陳先生「爆相爆片」捕獲，見到佢哋喺油麻地撐枱腳，Eddie仲似乎想偷啜朱慧敏，睇嚟佢哋已經秘密玩復合噃！讀者陳先生稱：「噚晚10點幾，我見到佢哋喺大中華食飯，得兩個人，佢哋對住坐，男仔趷起身主動哄埋女仔度，佢哄到好鬼埋，畀人情侶感覺。」問到佢哋係咪有偷啜？陳先生話：「嘴對嘴就冇，但佢哋哄到好埋，男仔仲向女仔摸面摸頭髮，女仔都冇避開，好似情侶咁。」從相片所見，Eddie戴帽遮光頭，坐對面嘅朱慧敏素顏情深款款望實男友，兩人深宵獨對撐枱腳，似乎有傾唔完嘅話題。本報分別致電向兩人求證復合，但未獲回覆。屢有偷食前科嘅Eddie，雖然之前死求女友原諒失敗，但佢似乎一直冇放棄重拾舊情，去年Eddie被問到係咪已經放低對方？Eddie已放風：「專心做好自己事業，拍拖唔諗住，不過我對任何事都永不放棄。」對朱慧敏未放棄？佢笑住話：「哈哈哈，冇放棄，我知道自己要專注事業先，做一個有承擔、照顧到屋企人、保護到另一半，先有資格有另一半，多謝關心！」朱慧敏則透過WeChat回覆《蘋果》謂：「多謝大家對我感情生活嘅關心，我同Eddie嘅關係都係保持住好朋友，因為冰室25號有活動，所以我哋好努力籌備，呢排會見好多面，都係公事上面。」
| Eddie噚晚約朱慧敏去食飯，讀者陳先生透過「爆相爆片」爆料。（讀者陳先生提供圖片） |  朱慧敏同Eddie（中）分手後仍保持聯絡，但兩人堅稱只係生意夥伴。（資料圖片） |  Eddie同朱慧敏屢次分手又復合，唔知今次會唔會又歷史重演。 |
 （資料圖片） |  Eddie舊年傷手，朱慧敏飛撲去探病 |  （資料圖片） |
 （資料圖片） |
|
鍾意就快D Share啦！
|
|
|
