2017年6月11日 星期日

【意外冇人想】蔡一傑爆一智尾龍骨同肋骨移位 林敏驄台上眼濕濕﹕我想講聲「對唔住」 __,林敏驄,蔡一傑,

林敏驄在紅館舉行嘅《今天星閃閃35年時日如飛林敏驄腦交戰作品展演唱會》噚日發生塌台意外,有兩名舞蹈員受傷,蔡一智亦整傷尾龍骨。尾場演唱會今晚如期舉行, ...


林敏驄在紅館舉行嘅《今天星閃閃35年時日如飛林敏驄腦交戰作品展演唱會》噚日發生塌台意外,有兩名舞蹈員受傷,蔡一智亦整傷尾龍骨。尾場演唱會今晚如期舉行,繼續係星光熠熠,唔少阿驄好友都嚟撐場,搞到阿驄係台上眼濕濕。當蔡一傑出場獻唱完《愛的根源》,林敏驄就上台擁抱傑仔,阿驄問:「冇事呀嘛?」傑仔話:「阿智整親尾龍骨同埋肋骨移位,冇事。好抱歉,原本草蜢可以表演一part畀大家睇。」向來無理正經嘅林敏驄開始忍唔住想喊咁,佢話﹕「我想講聲『對唔住』。」傑仔搭住膊頭安慰佢話:「唔好咁啦,今晚個個都咁開心,意外嘅事好難講,你地覺得好唔好睇呀?(觀眾歡呼)大家畀多啲掌聲阿驄。(全場拍掌)」阿驄嗚咽話﹕「真係個個artists為咗做好件事,伊健、基仔個個黎排哂舞,平時有哂dancers,o依家個個自己唱,個個嚟捧起我,o依家嚟出醜。」傑仔話:「點會呢?如果喜歡我哋嘅朋友,唔緊要,11月我哋草蜢紅館開演唱會。」蔡一傑演出完就離開紅館,佢話﹕「今日順利好多,自己唱嗰part都ok。(心情點?)平復好多,自己還好。(係咪好擔心阿哥?)每個人都擔心,仲有兩位dancers留醫,阿驄覺得唔好意思。主人家搞騷出意外,事發時都幾混亂,主人家唔開心都明白嘅,又要顧住個騷又要顧藝人。」對於阿驄眼濕濕,傑仔話都嚇一跳,佢話﹕「我有安慰叫佢唔好咁。阿智尾龍骨有少少裂,肋骨少少移位,已用中西合中西合璧嚟治療。」傑仔透露草蜢最快嚟緊7月去新加坡開騷,所以現在會盡量俾阿智休息,問到時會唔會減少跳舞?佢話﹕「應該唔需要,睇佢到時點,佢跳唔到我哋(與蘇志威)都跳到。」之後嘉賓黎瑞恩(小恩子)以一襲藍色透視長裙現身,阿驄話:「第一次開製作公司,啲飛好快賣晒,但係個台冧咗,咁即係叫你仲搞唔搞落去呢?」小恩子坦言:「驚呀,都驚呀。」阿驄再話:「小恩子係個好開心嘅人,咩嘢都難唔到佢。」之後小全程喺圓台台邊,邊行邊唱《迷惑》同《彩雲曲》。


來源 source: http://s.nextmedia.com
鍾意就快D Share啦!
Related Posts Plugin for WordPress, Blogger...