2013年4月27日星期六

Dry佘夜啅「脹爆伊健」

視後佘詩曼近年事業得意，感情生活卻陷入不明朗狀況，空有「姣佘」稱號的她自三年多前與鄭嘉穎分手後，身邊一直未有真命天子出現。眼見阿佘下月即將滿38歲，不少好友為她著緊，日前郭少芸便充當紅娘，帶同高大靚仔「脹爆伊健」赴約相睇！

入行以來緋聞多多的佘詩曼，早年緋聞情人如車輪轉般，自從2009年與鄭嘉穎結束兩年情後，雖然傳出數段緋聞，但全部只聞樓梯響，不久前便有指撻著年輕四載的富二代奀星麥子樂，她卻一一否認，由過往的「姣佘」頓變成「悶佘」。近年，她索性埋首拍戲搵真銀，更榮升圈中小富婆之一，但換來感情路上交白卷，守Dry足足三年有多！

下月38歲急搵伴

眼見「筍盤」下個月將滿38歲，早已達適婚年齡，阿佘不少身邊好友甚為著急，最近紛紛搞聚會，召集單身異性友人出席，希望能暗中為她牽紅線。據知，阿佘最初對「相睇」甚為抗拒，但有感不少好友已擁有幸福家庭，向來愛玩愛蒲的她亦開始心軟，不拒絕接觸陌生人！日前她便由好友郭少芸拉頭纜，於中環一間情調浪漫的西餐廳設相睇晚宴！

當晚八時許，郭少芸率先帶同兩名長髮高大靚仔俊男赴會，未幾阿佘驅車前來，匆匆泊好車後便急急腳走入餐廳。四人邊食邊傾，一餐飯食足兩個小時，直至晚上十時多，四人才前後腳步出。現場所見，阿佘對其中一名面圓圓、身形健碩兼頭髮飄逸的「脹爆伊健」最為嗒糖！兩人煞有介事地殿後而行，不停有傾有講，狀甚投契。

有傾有講曬甜笑

「紅娘」郭少芸見狀即識做地約各人一同趕下場，四人你一言我一語，「脹爆伊健」更細心地問阿佘的意見，最終似敲定地點，阿佘率先往取車，狀甚心急！雖然大家轉頭又會再見，但「脹爆伊健」對阿佘明顯依依不捨，目送她取車之餘更不停揮手，而阿佘對男方的體貼行徑亦相當受落，不時泛起一臉甜笑。最後，四人前後腳往郭少芸的香閨再暢飲，睇怕今次的約會都相當成功！

佘詩曼自與鄭嘉穎分手後Dry足三年多，決定接受好友安排相睇覓好歸宿！