掃呢頁CODE去手機

2013年5月23日 星期四

累街坊 布布累事 《巾幗 3》飛出台慶劇




變陣都好嘅!

(設計對白)

探熱針

累街坊 布布累事 《巾幗 3》飛出台慶劇

無綫剛播完的無厘頭科幻劇《神探高倫布》收視口碑重創,劇情騎呢睇極唔明,連累三屆視帝黎耀祥,以及集集狂嗌「布布」的馬賽,被網民瘋狂圍插,更要求 TVB腰斬劇集;低處未算低,重頭劇《金枝慾孽貳》同樣大跌眼鏡,創二十點收視新低。

兩劇連環仆,無綫決定將班底同《高倫布》幾乎倒模一樣的《巾幗梟雄之諜血長天》叮走,飛出台慶劇,怕觀眾未睇先噓。

陳豪法拉頂上

以警匪鬥智劇掛帥的《神探高倫布》,由開播到大結局,不斷被網民鬧爆,埋單收視跌到得番二十一點。監製李添勝為救亡親自解畫,指觀眾要坐低慢慢睇先會明白劇情,反而「布布」黎耀祥公開表示知衰,指劇本根本有問題,並表示會從錯誤中學習。

收視反映民意,無綫唔敢是是但但,先將幾乎由《高倫布》原班人馬炮製的《巾幗 3》,所有重口味劇情如輪姦、強姦以及雞姦戲一律刪走,更將《巾幗 3》飛出台慶劇之外。

「公司一直對添哥好有信心,加上祥仔做鐵膽,大家都寄予厚望,不過《巾幗 3》班底同《高倫布》一模一樣,公司怕再出事,決定換馬,將《傳愛事務所》變做台慶劇,話曬陳豪同陳法拉配搭比較新穎,唔會俾人熟口熟面感覺。《巾幗 3》今年一定冇得出街,明年先有機會播。」無綫工作人員透露。

《巾幗 3》班底係咪似曾相識?李添勝同黎耀祥以及馬賽都啱啱喺《高倫布》出現過。

《高倫布》被網民鬧爆,唯一例外的是唐詩詠扮演的精神病患者梅妹,被讚演技有進步。

邊拍邊驚

據了解,正在拍攝《巾幗 3》的黎耀祥邊拍邊驚,雖然編劇葉廣蔭是張華標徒弟,但功力同師傅差一截,早前更頻頻請假,手上只有大概十集劇本,唔想再拆三屆視帝招牌,平日少說話、多做事的黎耀祥,罕有地不斷追問劇情發展。

黎耀祥有壓力,一直希望憑《巾幗 3》再摘視後的胡杏兒更加失望:「因為有雯女(鄧萃雯)珠玉在前,當初開拍,佘詩曼同周麗淇因為唔想有比較,推咗唔肯接,杏兒應承做已經好有壓力,開工之後仲搞到情緒時高時低,拍得好辛苦。而家套劇俾公司抽起,今年連攞獎機會都冇埋,佢梗係唔開心啦,以往杏兒一定會主動同公司反映意見,今次明知要陪人做炮灰,仲點敢出聲?」知情者說。

《傳愛事務所》被安排頂替《巾幗 3》做台慶劇,原來是金牌監製徐正康(左四)回歸 TVB第一部劇,他當年監製的《男親女愛》,更令孭飛的黃子華和鄭裕玲人氣爆燈。

黎耀祥跟鄧萃雯憑《巾幗》一同連攞兩屆視帝視後,贏口碑之餘更贏收視。

剪短頭髮的陳法拉同陳豪合作《傳》劇,算係無綫近年比較新鮮的配搭。

是但膠劇

一不離二,繼《神探高倫布》後,《金枝慾孽貳》收視同樣慘不忍睹。打破慣性收視神話,全靠無綫膠劇一套接一套,自拆招牌。

《心路 GPS》

婆媽倫理劇情原本開正師奶口味,但過於拖泥帶水,連阿媽都頂唔順,埋單有 24點,算不幸中之大幸。最離譜係搵司棋姐做爛賭阿媽,毫無說服力,其中一場講司棋姐被賊人打到口腫面腫的誇張化妝特技,簡直是「經典」場口。

《戀愛季節》

有視後胡杏兒孭飛又如何!《戀愛季節》四個單元愛情故事,主角馬明、杏兒、吳卓羲個個「 hea」住做戲,就算有胡定欣同配角李璧琦拋事業線玩重口味,都未能令「膠劇」收視起死回生。



鍾意就快D Share啦!