張暖雅騎呢Pink Lady
【大坑】內地女星張暖雅（Angelina）因為裸照喺網上瘋傳而暫避風頭一輪，現時佢主力喺內地打碟登台搵銀，閒時喺微博透露近況，雖然佢自爆遭舊愛嘅女友長期騷擾，因而喪插鬧爆對方，不過似乎無損佢嘅心情，不時見擺美食相上網，仲親自撰寫自己嘅故仔，生活認真寫意悠閒。
■張暖雅唔單止打扮騎呢，連去超市買完嘢都要孭膠袋上身！
杜德偉隔枱坐
前日下晝5點幾，喺大坑見到張暖雅嘅導演老公胡耀輝，獨自企喺公廁門口煲煙，過咗一陣，就見佢會合一個頭戴灰色冷帽、身穿桃紅色貼身衫、牛仔短裙兼著上粉紅色厚底人字拖嘅女人，細看之後原來呢位pink lady係變臉變到好陌生嘅張暖雅，佢哋兩公婆手拖手，鬼咁親䁥咁四圍搵食，素顏嘅張暖雅打扮奇特，好彩當時人流唔多，總算未遇到奇異目光，結果佢哋揀咗間餐廳落腳，喺露天嘅高枱嘆茶。
■雖然杜德偉同張暖雅兩對恩愛夫婦只有一枱之隔，但私下似乎唔識，同場零交流。
■杜德偉（左）同太太Ice經常形影不離，認真恩愛。
張暖雅同老公不時喁喁細語，但一枱之隔卻發現杜德偉同結婚啱啱過咗一周年嘅老婆Ice，當時仲有個男友人一齊坐，相信佢哋唔識張暖雅兩公婆，全程零交流。大約過咗半個鐘，張暖雅同老公埋單走人，走去超市買餸，張暖雅仲好順手咁孭咗個裝滿餸嘅膠袋上膊，跟住兩公婆去坐港鐵返回位於太古嘅屋企。
採訪、攝影：羅德光、畢紹基
■張暖雅自裸照事件後，主力北上搵銀。資料圖片
足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你：http://bit.ly/appletalk24
|
鍾意就快D Share啦！
|
|
|
