稱被Paul逼揭拆夥真相 家強向世榮道歉
黃家強日前不惜以絕子絕孫兼全家性命擔保，在微博發表題為「真相」的逾5千字文章，數臭黃貫中（阿Paul）及反駁前經理人陳健添（Leslie）的指控，昨日家強在助手的陪同下，在重慶出席演唱會後返港。
對於今次在微博爆大鑊，家強被問為何事隔多年才爆真相？家強一臉平靜地說：「佢兩個逼我，因為有人爆咗啲冇人知道嘅嘢，爆完再扭曲！陳健添喺個微博不停咁鬧我，鬧足我兩年幾，我覺得有啲攰，如果你真係好想知道，咪講畀你聽囉！」他又承認律師信正在處理中。
前經理人Leslie明寸家強「誓願當食生菜」，家強說：「對佢嚟講係，但係佢𠵱家都唔敢，咁有乜好講，如果佢發誓當係食生菜，咁咪發吓囉！睇吓佢敢唔敢發！因為我冇講大話，有乜所謂，如果我冇講大話，我屋企人冇事，咁咪講得囉！佢一路講緊大話，佢咪驚囉！講完喇！」
■黃家強昨日返港後在機場表示，自己並沒有講大話。
■黃家強（中）在助手陪同下，自重慶返港。
資料圖片
準備出律師信
再問家強有指阿Paul不回應，避免毒誓成真？家強即說：「點會有可能，𠵱家係我發完，我覺得自己冇講大話，你話我講大話，你覺得我要自己去承擔，因為你唔敢，你問佢敢唔敢先囉，我就夠膽！」會否覺得公開Beyond拆夥真相會傷害葉世榮？家強說：「我覺得佢會原諒我，我同佢講對唔住。」不過家強稱至今仍未與世榮和任何人聯絡。至於律師信的內容，他則說：「留番畀律師講，我要講嘅已經講晒，夠膽就同我一齊發誓！」
此外，Leslie昨日亦繼續在微博留言，他稱阿Paul一直只想做一個結他手，只是在半推半就的情況下開始唱歌，他更稱：「Beyond之成一人之力，Beyond之敗亦一人之力，Beyond成敗一字之差。 」
採訪、攝影：葉君海
■黃家強就公開Beyond拆夥真相，向葉世榮講聲對不起，而前經理人Leslie（右圖）則指阿Paul一直只想做一個結他手。
|
鍾意就快D Share啦！
|
|
|
