黎瑞恩直認4千萬買樓：用嚟自住
2015-05-24 15:45:00
(攝影:陳俊強)
黎瑞恩（小恩子）同劉小慧今日喺荃灣，以愛心活動大使身份出席「我愛義師」活動，即場同義師宣誓，向一百名低收入家庭嘅學童提供一對一免費義師補習服務。
小慧指佢兩個小朋友喺暑假都需要隔日補習，準備明年嘅課程，小慧話都知咁樣係唔健康，但奈何社會風氣係咁，所以佢都諗緊方法逃出生天。小恩子就話：「 暑假乜都唔報， 一至五都死讀爛讀，放假畀佢哋玩下，好正常。」
小慧透露稍後會同小恩子、李國祥搞網台，開一個電台節目，向大家灌輸正能量，問小恩子會唔會講自己嘅感情生活﹖佢話：「我本身婚姻唔如意，失戀、離婚都唔開心，所以自己都有負能量，經過呢班朋友洗禮，我就有重生感覺，好似小慧，佢乜都和議我，就算我鬧人，佢都會撐我，但有次我好負面，小慧叫我唔應該咁樣，仲教我點做。」
小慧大讚小恩子嘅結果係預期中好，小恩子表示身心都舒暢晒！問小恩子係咪已經放下﹖小慧幫小恩子答：「乜都有。」對於被影到同「免稅店大王」鄭應南一齊，小恩子話：「係朋友，全部都係我嘅朋友，冇乜特別，呢個世界唔係男就係女，鍾意聽我唱歌咪嚟睇囉。」有指小恩子以四千幾萬購入三個單位，小恩子直認不諱：「係呀，其實係一個單位，只係拆開咗三個，我都會嚟自住。」
小恩子繼續否認同鄭應南拍拖
小慧透露稍後會同小恩子、李國祥搞網台
|
鍾意就快D Share啦！
|
|
|
