【晴報專訊】鏡頭前的朱千雪，笑容滿分，自信爆燈。不難想像，她能躋身成為無綫近年力捧的花旦群中。雖然同期對手還有陳凱琳、蔡思貝及岑麗香，但實情是，朱千雪這位「民選港姐」觀眾緣爆燈，加上鬥心極強，形象百變，跑長途賽冇得輸！
2012年參選港姐的千雪，因投票系統出錯，原本「贏硬」變季軍；但錯有錯着，她因此人氣急升，未卸任即被欽點拍台慶劇《On Call36小時II》，上位之快前無古人。「我做過醫生、警察、輕微自閉症患者，好似變色龍咁，次次都有突破。」現在每晚九點半熱播的《拆局專家》，千雪在劇中飾演電腦黑客，角色大癲大肺：「劇中我性格較反叛，但又對洪天明一往情深，同之前演專業人士好唔同，我好想有多啲新嘗試，日後角色性格都唔使被定型。」
自認鄰家女孩
在新劇《EU超時任務》首次擔正的她視好友徐子珊為目標：「子珊直情係女鐵人，工作態度好，拍劇時放膽去到盡，係我學習榜樣。」曾因角色需要刻意減肥的她，自言最恨演肥妹：「我好鍾意食嘢，可以名正言順增肥就最好！」
提到新聞多多的陳凱琳及蔡思貝上位神速，絕少緋聞的千雪十分輸蝕，但她說：「我唔介意曝光少，大多數緋聞都唔係真。」如何在花旦中突圍？她笑說：「我哋特質唔同，陳凱琳好高貴、蔡思貝陽光又Sporty，我就覺得自己似鄰家女孩，私下生活好簡單，巴士電車照搭，去快餐店會搭枱食飯，同食客傾下偈就最好。」
撰文：李潔盈
攝影（部分）：Lego
編輯：林梓添
設計：鄧俊明
|
鍾意就快D Share啦！
|
|
|
