十月宣布有喜的貝安琪，當日所見個肚已經大到似五個月，而男友全程只顧玩電話。
娛樂偵訊
男友冷落激親 大肚貝安琪易嬲又易氹
十月初， 34歲貝安琪在 ig宣布有喜，並準備與外籍男友 Simon明年結婚。雙喜臨門！但本刊卻發現佗住似五個月巨肚的她，因被男友冷落，當街發嬲。
大肚婆唔激得， Simon立即做嘢補鑊，一句說話就氹番貝安琪，令她主動攬住男友嘴！
連辣媽劉香萍也曾開口讚未來女婿，貝安琪呢個準老公，係有兩道散手。
似有五個月
今年九月，貝安琪著住鬆身衫出席活動時仍否認有餡，但唔夠一個月，她便於 ig自認大肚，又公開稱讚男友：「佢（ Simon）不嬲都錫我，好識照顧人。」
究竟 Simon有幾識照顧人？日前，本刊記者發現籮咁大個肚的貝安琪，孖住任設計師的 Simon去中環郵政局寄郵件。只見大肚貝安琪在郵局忙住填表騰來騰去，但男友就理都唔理，自顧坐埋一邊玩手機。
貝安琪黑面等氹
男友闊佬懶理，忍咗五分鐘，貝安琪開始黑面，同一時間，懵閉閉的 Simon走埋女友身邊想跟她分享手機訊息，嬲爆爆的貝安琪望都唔望，又唔俾反應。女友無聲抗議， Simon雖然聞到味，卻若無其事地坐埋一邊，繼續做低頭族。
肉緊嘴嘴
之後貝安琪自行走去櫃枱寄郵件，只見她一邊辦手續一邊回頭望男友，明顯是想知道對方是否有留意住自己， Simon亦不敢怠慢，自動波行埋未婚妻身邊，可惜人到心不到，仍然掛住睇手機。見男友唔緊張自己，貝安琪雖然冇出聲，但亦冇晒心機。
大肚婆情緒上落大，易嬲亦易氹！離開郵政局後， Simon終於唔再玩手機，講幾句說話氹兩氹，話咁快就搞掂，令貝安琪笑番，行行吓，她更主動攬實 Simon嘴。邊個着緊對方多啲，睇得出！
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
