平時發哥周潤發喜歡去九龍城買餸、食下午茶，今日下午兩點半，又見到一身全黑運動look嘅發哥發嫂出現，拍拖拖去福佬村道一家西餐廳食lunch，跟住兩公婆就去咗附近嘅老店——公和荳品廠撐枱腳。因為申請唔到食肆牌照，所以公和荳品廠上年底唔可以瓦碗、改用塑膠器皿盛載食物、收起所有凳，個個罰企，所以發哥發嫂都要企。不過其實發哥佢哋入到去之後根本都冇時間嗌嘢食，因為店內已經引起一陣騷動，個個食客都爭住同佢影相。發哥似乎同呢間店好熟，又或者因為發哥真係好吹得啦，又selfie又傾偈忙到不得了。大約三點左右，竟然見到特首候選人之一曾俊華，同太太曾黃蓮華一齊嚟到！原來曾俊華出任財政司司長期間已經同發哥認識，喺一啲公開場合都見過面，所以今日兩人一見面即握手寒喧飲豆漿。曾俊華話：「我成日都嚟，不過都係企唔係坐！」發哥就感觸謂：「我嚟呢度好多年喇，不過嗰陣係坐，唔係企。依家食環署搞一搞，就冇得坐。」發哥問曾俊華選舉工程進行成點？曾苦笑謂：「都好攰㗎。」發哥即笑佢：「你通波仔都唔死得，冇事嘅。」曾俊華就答：「可以通多次。」發哥仲讚曾俊華命硬。(編按:曾俊華09年9月27日因心臟病三條血管出現栓塞，即被送入瑪麗醫院接受「通波仔」手術，留院約一星期。)現場有人把握機會問發哥：「你支唔支持曾俊華特首？」發哥即謂：「支持！」但發哥好似唔係選舉委員會委員，好似冇權投票。發哥話：「我雖然唔係選委，但我作為香港普通市民，我都可以講自己心聲。」曾俊華亦謂：「雖然發哥唔係選委，但我爭取1,198名選委重要之餘，面對七百幾萬香港選民，爭取佢哋支持都好重要。」事後問番發哥點睇曾生，支唔支持曾俊華？佢都係嗰句:「支持！（點解？）有一次曾生通波仔，但佢出院冇耐就上班工作，我覺得好勤力，係一個好為香港服務嘅工職人員，好感動，應該支持。」發哥又謂：「我其實幾鍾意佢開頭輸入一啲電動車時，免第一次登記稅，不過o依家冇喇!我想買架電動車都唔得。」問到發哥希望新一屆特首做啲乜去改善香港？發哥話：「o依家香港民生方面，你起樓啲嘢都要時間去搵地嗰啲。」如果曾俊華真係選到特首，你對佢有何期望？「最緊要國泰民安，大家可以和諧，
扶貧方面做好啲，幫多啲老人家。」「其實邊個選到都好，希望可以為香港服務，令香港氣氛和諧，社會和平啲」
| (採訪、攝影：畢紹基、徐錦池) | | |
| | | |
| | | |
| | |
|
鍾意就快D Share啦！
|
|
|
