倫敦恐襲
Chilam舉家英國睇波
四太：擔心超欣
於香港時間昨日清晨英國倫敦橋和博羅市場（Borough Market）連環遇襲，造成7死逾48傷慘劇。剛巧張智霖（Chilam）和袁詠儀一家三口身在英國睇歐聯決賽，Chilam昨慨嘆：「好像世界哪裏都不安全！」9月送兒子去讀書的森美感驚慌，揚言要再考慮清楚；賭王四太孻女超欣在英國讀書，身為母親的梁安琪更坦言：「擔心超欣！」
四太昨表示超欣才剛剛返英國，叮囑她小心。資料圖片
英國今年連番受到恐怖襲擊，連同昨日清晨倫敦橋的一宗，已經是三個月內第三次，人心惶惶，昨日清晨有客貨車鏟上倫敦橋，刀手落車狂斬途人，附近的餐廳亦遇到襲擊，結果多人傷亡！張智霖一家三口事發時身在英國，他和太太袁詠儀（靚靚）帶兒子張慕童（魔童）到威爾斯千禧球場欣賞皇家馬德里對祖雲達斯歐聯決賽，昨早Chilam在facebook報平安：「很精采的比賽，皇馬及祖雲達斯都拼盡全力，謝謝你們！可同時又在新聞中得知倫敦橋有人受傷，希望所有人都平安。」
「世界不安全」
於恐襲發生前一日，Chilam兩父子還在倫敦玩facebook直播食早餐，魔童不停用英文跟網民吹水。而Chilam今日會現身中環出席活動，剛巧於恐襲後離開險地。昨Chilam以短訊回覆：「工作關係，本來就計劃今天回港，擔心總是有的，但傷心更多，好像世界哪裏都不安全了！發生事的時候正在球場睇皇馬，本來興高采烈的心情也被這事情變得不開心，願世界和平，恐襲不再！」
倫敦橋於香港時間昨日清晨發生恐襲，滿街都是警察。路透社
至於賭王何鴻燊的四房孻女超欣現於英國讀書，幸好學校不近倫敦，問到四太梁安琪會否擔心？她在電話說：「超欣啱啱先返咗英國，又恐襲？擔心都冇辦法，佢住宿舍，唔會亂咁出街，會打畀佢小心啲。」張兆輝的14歲兒子張焯鏗在英國約克讀書，最近放假跟同學去倫敦旅遊，幸好平安無事。張兆輝在電話說：「佢少去夜街，發生事後老婆有同個仔溝通，知佢冇事，我叫佢唔好留倫敦玩啦，今日佢會坐火車返約克。原本老婆諗住過去探個仔，𠵱家決定取消唔去啦。」
此外，森美的父母日前到黑池參加舞蹈比賽，森美接受電話訪問說：「爸爸媽媽今日返嚟，發生呢單嘢時應該唔喺倫敦，爸爸媽媽安全會好啲。」
倫敦恐襲後Chilam在微博報平安，並希望沒人受傷。
Chilam偕魔童到威爾斯睇波。微博圖片
袁詠儀前日在倫敦食飯時教訓魔童要講中文。
森美驚一驚
森美原定9月送14歲囝囝到英國讀書，問到計劃有否改變？他坦言：「英國咁快又第二單，呢個決定要考慮清楚啲，你咁問我又驚一驚，但應該唔會改啦，除非再發生啫。」昨日森美在灣仔出席活動，對囝囝將留學英國再表示：「佢讀書嗰度唔係倫敦，應該冇事，放假我唔畀佢留低，要佢即刻返嚟香港。」
至於陳智燊（Jason）的家人全在英國，8月會帶老婆宋熙年到英國參加弟弟婚禮，他回覆傳媒表示：「不過佢哋唔近倫敦，我聯絡咗佢哋都安全，多謝關心。」
採訪：皓騫、鍾國仁、唐如、陳杰
森美昨在活動上，表示囝囝留學英國計劃不變。
張兆輝表示兒子（左）已由倫敦返回約克，人身很安全。資料圖片
|
鍾意就快D Share啦！
|
|
|
