有線主持出身的李佳芯，至12年底跳槽無綫，獲公司給予機會拍劇，知名度提升。過檔無綫的有線幫中，以黃翠如較快彈出，兩女後晚同時角逐《萬千星輝頒獎典禮2017》視后寶座，論走勢及熱度，後起新貴李佳芯明顯食住黃翠如，更威脅無綫出身的宣萱、唐詩詠等大熱。
【大埔】
現年35歲的李佳芯（Ali）08年做有線體育主持出身，原名李嘉馨，12年底過檔無綫，改名轉運，演藝事業即大躍進。今年她憑台慶劇《誇世代》入圍後晚《萬千星輝頒獎典禮2017》的視后，面對勁敵《不懂撒嬌的女人》的宣萱和唐詩詠，Ali亦成賽前大熱。近年無綫缺花旦，昔日有線幫跳入無綫的藝員全部被重用，火速孭飛擔正，Ali的演技經過在無綫這幾年劇接劇的磨練，進步很快，同是有線幫的黃翠如雖也憑劇集《使徒行者2》角逐視后，但論呼聲似乎不及Ali。
Ali在去年先後播出的《與諜同謀》、《踩過界》和《誇世代》等劇集都甚有發揮，她近日拍攝新劇《BB來了》，日前在大埔海濱公園拍外景，同場還有林淑敏、黎諾懿和高海寧。Ali跟BB坐在草地玩野餐，她跟黎諾懿及BB在戲中扮一家人，現實生活有一子的人父黎諾懿，湊B冇難度，他不時舉高BB逗BB笑，身邊的Ali就拎手機幫手影相。當日Ali跟BB對手戲頗多，她趁空檔時亦不停跟BB玩，BB對「螢幕媽咪」非常受落，讓她任抱、任攬和任錫，未婚Ali母愛超級氾濫。
「投自己一票」
Ali去年在《星和無綫電視大獎2017》憑劇集《踩過界》摘下「我最愛TVB女主角」，對於再憑《誇世代》競逐視后，無疑是注下強心針，有指無綫肥水不流別人田，現為無綫親生女的Ali摘下視后成數很高。對於被封視后大熱，Ali受訪時表示：「我唔知自己係唔係大熱，啲人一直都話我爆冷，但係之前都冇乜信心，最近好多同事都畀咗好多信心我，又覺得自己辛苦咗成年，咁用心做每個角色，所以我自己會畀番個credit自己，投自己一票。」
有傳無綫想力捧Ali做視后，但Ali否認道：「從來唔覺得有被人力捧，但係好開心呢兩年多咗好多機會，好似上年都冇停過拍劇，對我嚟講係好開心。」對於其他對手，Ali看好《迷》的田蕊妮：「好多都係前輩，我心目中係阿田，佢個角色真係好好，換轉係我自己做真係唔知點做，我覺得阿田係好叻。」
宣萱再買磚頭
此外，另一視后大熱宣萱，昨日有報道指她最近由西貢搬到港島南區豪宅，喜愛投資磚頭的她是圈中小富婆，有周刊偷拍到她到地產舖，似乎有意再入市。演藝事業得意的宣萱，賺個豬籠入水，不過她選劇本好謹慎，有指她更游說古天樂，只要遇到好劇本，兩人即有機合體拍劇。
採訪：非非
攝影：畢紹基
|
鍾意就快D Share啦！
|
|
|
