由今日開始，袁詠儀（靚靚）嘅連載式訪問絕密登場，頭炮會先講佢個寶貝仔張慕童（魔童）。
2006年魔童出世，靚靚直言覺得佢同張智霖（Chilam）嘅人生都開啟咗新嘅一頁：「我覺得我個仔呢一刻係好需要我哋陪佢成長，我哋係個仔身上，更加了解到做人要係點，我哋都有另一頁去學點樣做，我覺得係一個得着嚟。」靚靚笑言自己同Chilam都係唔合格嘅父母，因為有時佢對住魔童仍然係太火爆：「我唔係嚴呀，而係有時我仲係有啲操控症，我希望佢聽我講坐喺嗰度企喺嗰度。」
靚靚同張智霖（Chilam）只得一個仔，當然係會錫到燶，不過佢兩個教仔方法好唔同，好多時會為教仔問題嗌交。靚靚話：「例如我個仔話，爹哋你幫我去買一樣嘢，我老公明明自己做緊嘢㗎喎，但佢都會諗盡辦法幫個仔去做到嗰樣嘢！但係我嘅角度就唔係咁，我會話俾個仔聽，唔得喎今日，因為我做緊嘢，但係聽日我會嘗試幫你去買。」
相比起靚靚呢個嚴母，順得人嘅Chilam自然受魔童歡迎啲但係點解靚靚又唔試下用埋老公套教仔方法對魔童呢？靚靚解釋：「我無用晒我老公嗰套同個仔相處，因為如果我用晒我老公嗰套呢，我個仔就會變成一個好離譜嘅人，太放任喇！」靚靚自言睇嘢比較長遠，佢覺得太就個仔反而害咗佢：「太就佢的話，呢一刻你係好開心，佢係好開心，但係過多20年後，佢出嚟呢個社會做事，唔會有人咁樣對佢㗎！唔會有個老闆俾你咁樣做！所以我一定要話俾佢聽，做事係要有程序，係要等嘅。不過我有啲嘢都會學我老公，例如我以前聽都未聽佢講晒就say no，但依家就會聽完佢講之後，再話『嘩！你咁都諗得出嘅！咁無聊嘅嘢你都諗得出』，我會用另一個方法話俾佢聽，其實你咁樣做呢唔係唔好，不過我就覺得如果唔做就會更加好咁我個仔就會覺得，你好似同我商量緊喎！我覺得依家好多小朋友都係，已經唔可以夾硬嚟，要傾㗎。」
問到靚靚有冇試過體罰個仔？佢話：「打㗎！前日先打完，打手板囉！佢扯甩我條褲咪打佢手板囉！點可以咁對女仔㗎啫！我個仔都唔算係難教，但佢都幾有自己嘅意見，我老公係好尊重人權嘅人，變咗好多時候我就會喺佢咁堅持之下，我唔會同佢硬碰，其實我覺得佢硬頸係似我，我老公會冇咁堅持，可能佢會想嗰樣嘢，但如果你真係話俾佢聽唔好佢會諗辦法去解決！」
靚靚一直覺得自己嗰套先啱嘅，覺得老公嘅放任無王管教仔方法會寵壞個仔，所以佢經常強迫個仔同老公跟自己嗰套做；有一日Chilam好認真咁同佢講，個仔想換媽咪，靚靚簡直係晴天霹靂，自己生嘅仔，竟然唔要佢做媽咪，知道咁大鑊後，明白再唔補救，真係會出大事靚靚一直係自信心爆棚，又為個家付出咁多，點會諗到個仔唔受佢個套，連學校老師對佢教仔方法都有意見。靚靚話：「我初初嘅時候好主觀㗎！直至到幾年前個仔好認真講要換一個媽咪，咁我老公就問佢 你想換邊個媽咪呀！咩類型呀嗰啲咁，咁我嗰陣時其實先至知道有問題，但我覺得有問題都係佢（指囝囝）有問題喎！唔係我有問題喎！咁當然，係佢行為上，佢梗係有啲問題」
靚靚續說：「當時魔童嘅學校就轉介咗佢去見一啲醫生，要check下佢係咪有一啲過度活躍症呀，又或者睇下佢係咪有嗰啲自閉症呀！因為佢無辦法集中上堂，佢會做完晒佢自己嘢，好快佢就騷擾人，呢啲係學校嚟講，都係屬於種學習障礙。但轉介佢去檢查嘅時候，佢無呢啲問題喎！但係點解佢個人會突然間咁angry，於是學校就再轉介佢去見一個心理醫生，我就梗係跟埋去」
到底心理醫生同靚靚講咗啲咩？想知就睇埋另一則動新聞
記者：陳月媚、倩宜
攝錄：馮峰、卓振輝、吉吉
攝影：林德雄
化妝：Kerry wong
髮型：Sam Pan @Muse Hair
場地提供：好酒好蔡
最港電影大獎投票網址
http://bit.ly/thekongestfilmawards
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
