黃宗澤疫境中「一齊捱」餐廳生意跌八成 盼保員工生計
型男黃宗澤（Bosco）再次為邵氏的《飛虎》系列賣力演出，繼首作《飛虎之潛行極戰》後，Bosco再度與三哥苗僑偉以及老友吳卓羲（Ron）在續作《飛虎之雷霆極戰》中聯手。而新作依然不失緊湊的連場動作及槍戰戲，Bosco卻在拍攝途中不慎夾爆腳掌骨折，慘變「跛co」但仍然堅持拍攝工作，拖住「天殘腳」坐輪椅上陣，他笑說：「文替武替都盡出，要多謝武師及幕後做我的人肉輪椅，記得有一場阿Ron同我對打戲，當時我坐住輪椅上半身配合，我打得好認真的，他就忍不住笑囉！」
Bosco今次領軍遠赴英國拍攝，更與荷里活影星Lee Pace有大量對手戲，為此勤練英文，流利程度連拍檔三哥都大讚，Bosco笑指自己都落足苦工，自費請了英文老師上課兼隨行，他表示：「劇本英文都幾書面的，所以我都想有些口語及俚語演出，就請老師睇英文對白有無地方可以執執。」而今次《飛虎之雷霆極戰》中，Bosco的女伴由前作的王敏奕「換畫」成華姐冠軍張曦雯，Bosco對拍檔讚不絕口謂：「梗係好開心（合作）呀，大家的女神，最鐘意是她性格好爽朗。（有請她教英文嗎？）有呀，結果搞到我們冇乜偈傾，因為她同我的英文老師太好傾了。Kelly（張曦雯）去英國拍劇就爽了，頭尾拍兩日，我就拍足九日，她放話丟低我去法國走一轉，後來她沒有去留低陪我們，都叫做有義氣！」
買家品買上癮
Bosco向來給人印象十分貪靚，相信是羨慕拍檔可以去法國買靚衫，提到網友都愛討論他個人化的衣著，Bosco笑說：「哎，依家少買衫了，年紀大了鍾意買家品，更毒呀！以前買衫都沒發覺自己的強迫症咁嚴重，買家品一買便是一套，好似浴巾同面巾，我一定要買同款同色的，買足幾套更換，浴巾換下來面巾跟住一起換，襯返色，連我媽媽都受不了！（長期在外地拍戲會好不方便？）係㗎，所以行李一定會多，然後我一定要住有廚房的服務式酒店，最好有露台，因為覺得奇怪的家具就會被我推出去，到退房前一日便幫酒店打掃、乾乾淨淨退房。」
而系列作將開拍第三集，Bosco的女拍檔將再度換畫，但他與三哥及好兄弟Ron依然「打風都唔甩」，他笑說：「最緊要是三哥肯拍，冇他帶頭便無法成事，哈哈！講起Ron都是緣分啦，以前電視城日日見，但是在化妝間！咁多年只合作兩套劇，所以我們都話娛樂圈係圓架，今次更加上馬國明三兄弟，最開心大家都冇乜點變，只是年紀大了、做事成熟了，拍劇時同樣嘈到不得了，講極都唔停，但大家鍾意的類型又完全不同喎！好似車咁，我就鍾意古董車、阿Ron鍾意跑車、馬明就喜歡吉普車。（聽落好似反映了某些喜好？）哎呀，我好似明你講緊乜，真係衰！」
網上生意唔敢做
疫症來臨，Bosco的演藝工作很多都被迫叫停，而經營蠔吧生意的他，亦坦然面對困境，他說：「自己都冇諗過唔做，只可以諗呢個情況係暫時的，一家店十多位員工，揹起了廿個家庭在身上，現在有補貼申請就申請，仲未想到要減人工，經理已經叫我開會，話大家會輪流放無薪假，不算好多，每個月2日，員工都好幫得手。」在疫情肆虐後，生意最差足足少了八成，Bosco坦言從未想過會發生：「爆發前一刻都同經理傾緊、睇緊鋪想開分店，想不到講完無耐就變成咁。」Bosco指餐廳是成副心血，員工的支持令他決心一定要捱下去，問到可有措施開源？他說：「朋友建議上網賣蠔，但我唔識電腦，我家的電腦只用來看劇本的，最基本就睇埋YouTube囉，唔識的事我就不敢做了。」
留家閉關 省靚個櫃
Bosco又指疫情帶給他另一種體驗，笑說：「都是出社會以來第一次，有一個長假可以留在家中，往常一年只有零星幾個月時間在家，突然可以留在家中幾個星期，發現自己都變晒了，突然可以停低，睇睇自己的屋企，見到客廳木櫃有點舊，自己就心血來潮買齊油漆、砂紙慢慢搞，上幾層油再慢慢省靚個櫃，咁就過了大半日！」Bosco全心投入生活，連社交網站都是最近才再度更新，與尋常人一樣過着約老友行山、與狗為伴的生活，他說：「其實在這段時間都同樣忙，安排一下之後的工作，幫餐廳構思新菜式、約經理開會，再下廚試煮。我好鍾意煮飯，但煮出來緊係要搵人食，咪約班朋友上來食，平時約見面都要幾個星期，現在一呼百應，我就鍾意煮好一道菜拎出來畀大家食，再走入廚房繼續煮，結果食餐飯都起碼4個鐘！（邊個街市可以捕獲你？）我習慣返細個長大的沙角村街市買餸，全部檔口都好照顧我，買慣買熟架。」
媽咪從未催婚
Bosco與媽咪相依為命，想必這段日子多了時間母子相處，他笑道：「都係，但媽媽節目多過我，叫我不用等她開飯，我反問她不是要社交隔離咩？（媽咪有把握機會催婚？）當然冇，從來沒有催過任何事，始終自小單身家庭長大，我跟她都沒有典型幸福家庭的畫面，親戚朋友搞笑問幾時生個孫？媽咪第一個跳出來說『唔好呀，生出來唔好旨意我湊』，見到她落晒閘，我都少些動力啦。」Bosco又爆料指媽咪對身邊女性評價兩極，笑說：「一是『好OK』，一是完全不會同個女仔講嘢！（捉摸到自己喜好未？）順其自然啦，大家都知我有甚麼緋聞對象，不同類型都出現過了！」Bosco又笑言經常與媽咪為小事嘈交，因對方個性『哩啡』將東西亂放令他強迫症爆發，自嘲說找女伴最重要是先過這一關！
原文《星島日報》名人雜誌（逢周日見報）
|
鍾意就快D Share啦！
|
|
|
