出Po寫長文狂讚老婆 林子善獲圈中人妻陳自瑤麥雅緻大力支持
林子善17年娶了圈外女友Kary（董佩欣）後，即變身愛妻號，去年12月太太為她誕下愛女以晴後，他升呢住家男，乜都以家庭為先，呢日他又出Po寫長文狂讚老婆Kary，除了好體諒子善為工作好少時間陪伴她同囡囡，而對子善所有決定都會給予支持，令他相當感動。子善仲叫一班兄弟加入他得閒讚吓老婆行列，保證夫妻關係更加好。呢個Po一出，當然第一個讚好是子善老婆Kary：「你返工一（日）捱夜捱又冇得訓（瞓）甘（咁）辛苦...我同bb全力支持你，加油」亦即時引起不少圈中人妻回應，好似跟王浩信結婚9年、育有一女的陳自瑤：「講得好！」；曾跟台灣老公成婚4年、現已離婚的陳煒：「有最強後盾，是幸福的，加油！」;以及嫁了給張頴康8年、生了一對仔女的麥雅緻：「世事都被你看透，夫婦相處之道就係多讚美⋯我讀緊碩士都冇你講得咁叻呀」。
子善讚美老婆Po全文：「呢個POST係我頭先行行吓返屋企好想，歌頌下我老婆平時對我嘅體諒，首先大家都知道做我呢行忙起上嚟非常忙碌，放工返屋企全家瞓緊起身返工全家仲瞓緊，因為好多時真係只瞓得幾個鐘頭，仲要好多時一放假，除咗休息之外通常都去咗做健身，尤其是近排操得密左時間分配少咗俾老婆同BB......但我老婆都非常支持我做嘅一切，令到我更放心打好呢場仗，每個人都有佢自己嘅家庭，都有一本難念的經，但出嚟做事如果有個好似我咁嘅老婆真係非常幸福，所以好感恩佢一直支持我，包括放棄做老闆佢都好支持，好似今晚咁操都咁夜成12點先返到屋企，佢每次見到我第一眼永遠都係笑，我個女同佢好似每朝起身見到我第一眼都係笑，所以好想喺度多謝佢嘅支持。我成日同好多兄弟講，放大老婆嘅優點縮小老婆嘅缺點，你想做皇帝就要將老婆變成皇后，多啲讚賞老婆同多聆聽佢嘅說話，如果你唔聽佢講嘢佢搵第二個聽，咁呢啲叫做捉蟲入pat pat你諗啦，我從來未怕過老婆因佢一直守護我，你都試吓出P讚自己老婆關係必定好，BIG BABY I LOVR YOU#常感恩#愛老婆
」
|
鍾意就快D Share啦！
|
|
|
