錢國偉圈中人緣甚廣，不少人留言悼念。
金牌監製錢國偉打造不少膾炙人口的作品，除《獎門人》系列外，《美女廚房》同樣為人津津樂道。對於錢國偉離世，有份主持《美女廚房》的梁漢文表示：「我依家仲隔離緊，其實尋日知好多朋友立即去醫院見吓佢，其實我嚟隔離之前，大約喺8月中去過醫院探過佢一次，知佢病咗一段時間，之前佢唔係好想大家擔心，唔係好見我哋，但係近呢一、兩個先可以再見面，收到呢個消息（好友離世）有啲突然，希望佢安息，亦都希望家人、太太唔好太傷心，節哀順變，好好照顧佢哋嘅小朋友。」他又說和錢國偉入行不久時已認識，最早期有合作《獎門人》，之後在《美女廚房》中變得更熟稔，期間再合作兩次《BIG FOUR巡迴演唱會》，由對方做監製，和他在台上或台下，無論玩及工作已建立很大的信任及長久的友誼。
蘇永康昨日曾到醫院陪錢國偉，他說：「我喺醫院睇住佢、陪住佢，但唔係話睇住佢走，我同許志安都喺度，盡量喺佢耳仔邊同佢啲老友嚟晒、喺晒度，休息一吓啦，當然要鼓勵佢，叫佢快啲好返，同佢話我哋BIG FOUR又重組，係知道係唔得，但都畀啲希望嘅說話佢，佢講唔到嘢，佢畀咗個OK嘅手勢出嚟。我知佢食唔到嘢，但我冇嘢為佢做到，就買咗個芝士蛋菠蘿油畀佢，同佢話食得落就食啦，呢個時候要畀啲希望佢，我走時又叫佢休息吓，唔好諗咁多嘢。我哋BIG FOUR喺拉斯維加斯睇住佢求婚，喺頂樓放埋煙花，睇住佢小朋友出世，佢仔（女）細老婆嫩，都好唏噓，日後幫得就幫，希望佢太太堅強啲。」
歌手古巨基與錢國偉合作無間，古巨基於社交網悼念：「心很痛很痛很痛。眼淚不能停止。短訊記錄裏那些相片和對話。我們每次的並肩作戰。每場演唱會前在我耳機裏你說的那句『基仔good show』。心很痛很痛。願你早登極樂，喃嘸阿彌陀佛。」
據悉，身為錢國偉好兄弟的鄭伊健，近日忙於拍攝電影，今日如常開工，片場內未有被情緒帶動，相當專業，但經理人公司不想影響拍攝工作，電影公司亦婉拒記者探班。
而電視劇方面，他更帶了不少人踏進電視圈，當年《四葉草》系列內，他便大膽引用了唐詩詠、楊秀惠、李思欣及衛詩雅等新人。唐詩詠對於錢國偉離世大感心痛，她在社交網留言：「因為你，我才有機會拍劇，才有今天的我。」她受訪時表示：「《當四葉草碰上劍尖時》係嘅第二個劇，當時Wilson係監製，佢從來冇架子，成日同我哋打成一片，佢都係一個鍾意玩嘅人，我喺佢身上學到一樣嘢，佢係工作時工作，玩又可以玩得好投入嘅人，佢喺綜藝創作方面好出色，好多有創意嘅Idea，好多謝佢，有佢我先可以入到TVB。」
而李思欣亦表示《赤沙印記＠四葉草.2》是自己入行第一套劇集，當年演藝畢業後，錢國偉親自揀人拍攝，亦在當時挑選了思欣，後來安排她任「二家姐」角色，思欣接受訪問時坦言：「都係Wilson帶我入電視圈，今日聽到消息，好唔開心。」姚子羚表示：「都係因為Wilson搵我拍呢套劇我先有機會接觸拍戲，佢都算係我人生其中一個伯樂。」
連詩雅（Shiga）當年接拍第一部電影，正是由錢國偉（Wilson）導演的電影《喜愛夜蒲》，她更憑該片提名「最佳新演員」，Shiga對Wilson病逝回覆：「聽到這個消息非常痛心，還記得我初出道還是新人的時候，很多人都對我有質疑時，他都一次又一次給我拍戲的機會，我會好好記住這伯樂，希望他一路好走，也希望他的家人堅強面對。2020真的很不容易的一年，祝福大家身體健康，珍惜身邊擁有的一切。」何珮瑜（Jeana）亦情緒低落：「好擔心佢太太同囡囡，希望一切安好。（同錢國偉相處有咩難忘事？）佢係眾人開心果，有佢嘅地方就充滿歡樂。當年我哋去馬來西亞拍戲，逗留咗兩個幾月，每晚放工佢就帶我哋去酒店對面一間餐廳開飯，大家一齊去按摩就吵吵鬧鬧，因為總唔夠技師分配畀我哋。」
藝人賈曉晨（JJ）憑《美女廚房》為人所熟悉，她於社交網悼念留言：「從我人生中第一個綜藝節目美女廚房，到味分高下，到奬門人，到做你們的伴娘，到我們兩家的小孩差不多時間出生，到參加對方小孩的生日會，十幾年了，你是我的前輩，也是我的朋友，我們大家一起成長。。。很幸運認識了你這位有才華、又幽默、重義氣、愛老婆、愛小孩的朋友。。。很難過」
錢國偉在圈中人緣甚好，亦樂於提攜後輩，曾與其合作的藝人紛紛在社交網悼念。
來源 source: http://hk.on.cc
|
鍾意就快D Share啦！
|
|
|
