熱播中的ViuTV《全民造星3》，27歲的張進翹Manson可謂多才多藝，無論色士風、鼓、長笛及結他樣樣皆精，不單花姐指他有黃家駒的影子，最近他與顧定軒擔任BL (Boy's Love) 的節目《我們》，裡頭演同性戀兼親嘴，獲一致好評並勝出比賽。故在前哨戰甫出場，導師KP與林二汶便展開激烈競爭，欲將Manson收歸自己團隊，令他一夜間fans暴增，連姜濤也在IG點名讚好，好有觀眾緣。
人紅是非多，Manson隨即被網民起底，指他十年前涉及一宗自稱玩4P的短片，Manson大方回應年青時魯莽，因戲言令人誤會。不過，這也令粉絲有興趣去了解他的內心世界。
原來， Manson與抑鬱搏鬥數年，想盡辦法自救的他，更一度離開幕前轉行做農夫，他說希望藉耕種找到一個全新的自己， Manson坦言在耕作時，比與人相處更開心。
Manson 是家中獨子，自小與媽媽相依為命，他說 :「其實患有抑鬱症嘅時候，真係媽咪陪伴我最多，雖然佢唔知點樣幫我，但我同佢一齊住，所以相處時間特別多，喺我創作音樂嘅時候，佢都會係我隔離。」
Manson認為抑鬱或與成長有關：「家人都有類似問題，精神會比較緊張，其實果段日子真係幾困難，因為我睇返嗰陣時自己寫嘅日記，可能會因為一件好小嘅事而自責，質疑點解咁樣做，或者因為講錯一句話，會覺得全部都係自己做錯，一定要改，依家睇返以前嘅日記，都感覺當時真係幾可憐。」
雖然擁有偶像外型，但Manson喜歡自我批判，又在意別人眼光，是以自我形象極低，更枉論自信心。約一年前， 他放下儲了三年的幕前經驗，決定轉做農夫，在一個未知的旅程尋找出路。Manson說：「我好鍾意拍片，又好鍾意旅行，又唔怕捱苦，但因為嗰陣時疫情爆發冇得去旅行，有一日媽咪同我講，睇Facebook見到有人聘請農夫，佢鼓勵我去試吓，當刻自己覺得主意不錯，因小時媽咪成日同我講植物係有感受，如果你同植物傾偈或者唱歌，佢哋會生長得比較快，你係點樣嘅人，植物都會感受到，唔會加filter去判斷你。跟住我打電話去應徵，大家經過一輪溝通，面試後，就正式當上農夫，喺做農夫過程中，我終於找到自己優點。」
不過月薪九千元，包食宿的農夫生涯並非他能想像，Manson說：「當時我有一個奢想，係咪有得住幾千呎獨立屋，因為本身居住環境比較細，缺乏空間，如果生活環境有一片草地已經可以好開心。點知住2000呎係鐵皮大屋，好污穢，無冷氣，有蛇又有蜘蛛，因為有好多蜘蛛網，自己要進行大清潔。但我亦都將呢個過程拍成一套紀錄片，我覺得好開心，嗰份開心係來自勇敢。」
在耕種過程中，Manson自言有所啟悟，與其每天自責，不如做對自己有益的事。有了這個念頭，他成功戒掉煙酒等壞習慣。Manson說：「已經試過嘗試戒煙好多次，每一次朋友都唔睇好，或者覺得我無可能做到，又會話我已經講咗十幾次，會有好多無形嘅打擊。但我應承自己要做有益事，所以今次就戒咗。」
有全新的Manson出現，除因有媽媽鼓勵，還有遇上伯樂導演麥曦茵，對方簽他成為旗下Dumb Youth新人，希望他除下保護面具，放膽呈現真實的一面。「麥曦茵除咗係我嘅伯樂，仲係我嘅心靈導師，因為佢發掘到我自己都睇唔到嘅優點，同時佢都想我做返自己，搵到我內在嘅優點，佢唔會塑造我成為另一個人，而係希望我做返自己。」他說。
來源 source: http://nextplus.nextmedia.com
|
鍾意就快D Share啦！
|
|
|
