安德尊（大王）日前接受車淑梅主持的《舊日的足跡》訪問，罕有深情剖白情史。安德尊曾被傳是中英混血兒，他澄清說:「我係河南開封人，包公同鄉，但當日有人玩遊戲問呢個問題，又搵唔到我去證實，結果誤傳咗，我都冇乜意見。」他坦言是窮家出身，父親為海員，一家七口曾蝸居於百尺板間房，少時常跟外婆看戲，自小就發明星夢，亦想過長大後要當醫生。他更自爆當年曾追女仔追到菲律賓修讀藥劑學，惟及後女友去世，故此未完成大學就折返香港。他鮮有地剖白:「我咁大個仔唯一心儀嘅就係當年喺香港電台遇上嘅關寶儀，不過而家人哋都已結咗婚，我當年因為窮出身，唔敢高攀一個咁好嘅女仔，我哋仲係好好朋友。」
今年9月便「登六」踏入60歲的他，曾經傳出和鄧兆尊爭車厘子，原來一直有個白滑女友「阿So」在身邊，兩個秘密拍拖多年不為人知，事關他每次帶女友現身，都以「女助手」作介紹，問到跟他20年仍未嫁的助手是否一直在等他？安德尊笑說:「我希望佢係總之你儲定人情！不過講真，我唔想結婚，因為適婚年齡已經過咗，人稱我鑽石王老五仲好笑，20 年前我一時愚昧聽人講戴鑽石幸運，有光環吸力量，買咗卡4萬幾蚊嘅鑽石，喺鏡頭前閃吓閃吓，後嚟被人笑，戴咗一年半載除咗唔敢戴。」
安德尊與余慕蓮份屬好友，提及對方的病情，他說:「因師傅曹達華關係，我哋時時見面，我仲喺佢哋面前表演八式『如來神掌』，佢（余）視我親如子侄，佢嗰晚入ICU前打畀我，話出得嚟就再見，出唔返就下世見，我心都實埋，講唔到嘢！我話『放心，我會幫你都係舉手之勞』。至於佢間屋點樣處理，佢係一個大善人，不過呢方面佢就諗來諗去轉來轉去，都未諗清楚捐去邊度，我等佢好返出院之後再去處理，因為一切都未落實。」
雖說安德尊人緣好，卻偏偏跟名廚李錦聯頂嘴，安德尊直言:「唔啱就係唔啱，頂嘴就係頂嘴，唔係故意。佢煮餸好叻，對食材好叻，不過有時被我捉到佢甩漏，係佢唔好彩，因為佢唔夠仔細，抽秤抽秤吓就慣咗咯！我哋都好好傾，佢飲咗酒我就唔同佢傾，佢唔飲酒我就傾，不過佢飲咗之後，其實仲好傾，成個李白坐喺漁船上嘅感覺咁搖吓搖吓。我有講過叫佢唔好飲咁多，但係我知道呢啲係佢嘅人生樂趣。」
提到他每次現身都是西裝筆挺，安德尊指乃是聽從師傅曹達華的教誨，「師傅除咗成日叫我唔好學賭錢之外，仲要勤力，佢話扮死屍都要畀心機，扮個好樣嘅死屍，仲叫我做明星要有番個明星款唔好失禮，所以我為咗氹老人家開心，次次都執到正，整整吓都習慣咗，而家衣櫃有200套西裝。」講起形象，安德尊續說：「人哋話我戴冇鏡片眼鏡、着西裝為行運，真正原因係眼鏡反光，唔想打燈師傅爬上爬落咁危險，最重要有一次我去香港電台泊車，除咗副眼鏡畀保安攔截問我係邊位，我戴返佢先認得我，自此就唔敢除喇!」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
