轉型獨立歌手積儲快乾塘 何雁詩不排除重返星夢
何雁詩（Step）最近推出新歌《灰夠》，以她過往一段慘痛愛情經歷做藍本，當時她曾為對方喊到眼腫，要長期擺定鐵匙羹入冰箱用作敷眼，現在已成幸福人妻的她，錄音也搞到情緒低落，好彩有好老公鄭俊弘呵番。轉型獨立歌手年多的Step，原來準備推出EP作小紀念後，暫未有推出新歌計劃，她直言因已花6位數積儲已快乾塘，有意再簽唱片公司，更不排除會重返星夢。採訪：杜淑霞 場地：Fb eat all day
Step新歌選擇以該段情作藍本，並非因特別深刻，只是太戲劇化，「我曾經有個另一半做咗好多壞事，我一直包庇佢，但睇唔到將來會開心，拖拉咗半年，我覺得嗰種痛係因為離開時仲係好愛佢。嗰段日子長期有堆匙羹擺喺雪櫃，因為朝朝隻眼腫到爆，如果有時冇羹試過用雪藏雞翼敷。嗰段時間真係好攰，成日鬧交鬧到好夜，第二日要拍劇會早兩個鐘起身雪眼，𠵱家諗番好無謂，初初痛會覺得暗爽嘅，愈痛愈愛，但痛過好多次就會知道齋得個痛，𠵱家唔需要吓吓咁戲劇化，可以日日好簡單咁樣。」
最初Step搵歌時，講明要有點K歌feel，令樂迷有機會去爆，唱起來會好爽，她錄音時也覺得好正，但錄完後竟然要老公鄭俊弘安慰，「錄嘅時候係好爽，獨立之後錄得最快係呢首歌，但我預計唔到，呢首歌會帶咗啲唔開心情緒，唔係我未忘記呢段情，只係好想爆喊一鑊，我老公以前都冇見過我咁樣，但佢好願意聽，知道同我溝通會幫到我，我喊完就舒服番晒。」
《灰夠》將會收錄在Step即將推出的EP內，但她坦承這隻EP後，未知幾時會再推出新歌，「舊年3首歌加埋呢首夠4首出到EP，算係對自己獨立後少少嘅總結同紀念，因為都未有計劃出下首歌住，雖然寫咗啲demo喺度，有啲真係可以出，但資金問題，再咁出爹哋媽咪殺咗我，已經使咗大筆嘅6位數，銀行戶口真係好乾，我要搵多啲錢先得。」她坦言有意再簽唱片公司，跟TVB仍有經理人約的她，更不排除重返星夢，「公司之前都有問過我想唔想，我都唔係太清楚𠵱家星夢係點，有好多嘢慢慢傾，我覺得一間唱片公司最緊要我同佢睇法夾，我最大要求一年出3首歌，之前點解離開就係因為想有多啲作品，我入咗行超過10年，又就嚟30歲，都想keep住有多啲作品，唔係過多幾年就30幾，可能要生仔，呢幾年係要衝，歌星最緊要有歌出，希望有間公司會相信我嘅潛質。」她更自爆為搵錢出賣自私空間，「早前《新春開運王》話要拍我哋屋企，我最初唔想，但係話有兩個騷我哋即刻接，幾cheap呀！哈哈！」
|
鍾意就快D Share啦！
|
|
|
