闊別娛樂圈多年的吳麗珠，將於明日作客香港電台的《舊日的足跡》，吳麗珠人生中似乎缺乏一個伴侶，被談論的只有兩個名字──陳百燊、許冠武。吳麗珠剖白：「我有好多段（感情），只係嗰兩段被知道嘅，不過我唔抗拒，我見過有人 70 歲結婚，我未試過，可以試吓嘅。結婚唔一定等於幸福，當年同陳百燊係訓練班同學，一齊幾年，分開咗我唔想搬返屋企，余慕蓮（余毛）就租咗間房比我住咗一年，所以我好錫余毛，佢係我恩人。」
「至於許冠武，我哋一齊 12 年，應該好穩陣？可能我自己並唔係要求呢一樣嘢……（我哋拍拖）唔係阿 Sam（許冠傑）介紹，因為我哋（我同許冠武）都鍾意夜蒲，鍾意飲酒。當年我哋計劃去拉斯維加斯結婚，連主婚人都約好，但嗰陣我剛出嚟做地產，見到外面嘅世界，感到對方未必適合自己。我同佢傾，佢似乎冇乜反應，我再表示我要離開，佢都冇反應。我仲記得我唔想佢媽媽唔開心，因為我哋同佢媽媽一齊住，於是我好似螞蟻搬家，每晚返去偷走一啲衣物，我唔想佢見我一日之內搬走所有嘢，因佢媽媽都錫我……後來我冇交代，但我都有出席許媽媽同許冠英嘅喪禮，因為我覺得我哋兩個人嘅事，同佢嘅兄弟姊妹同媽媽冇關……」
今年 10 月 10 日是梅艷芳58 歲的生忌。吳麗珠憶述最難忘 1992 年 5 月初那個晚上：「我同兩位女藝人照常喺《歡樂今宵》收工後去去咗九龍塘嗰間卡拉OK 玩，諗唔到竟遇上阿梅被人掌摑嘅事……其實佢係俾人『質』咗一拳，我親眼見到，佢當時係由其他房間走入嚟坐低，我哋坐喺附近，嗰個人由另外一間房氣沖沖走入嚟，好似話阿梅唔畀面，我當時都唔知發生咩事，我哋驚到叫走，我冇叫阿梅一齊走，因為我見好似有人幫佢解決同面對。事出突然，我驚到開車都腳軟……後來，九龍城差館叫我哋去落口供，我真係好擔心阿梅……」
吳麗珠坦言：「再見返阿梅我冇再提起，知道佢去咗泰國一排，再出返嚟應該已經係解決咗。」「阿梅真係好好心地，佢份人好豪情，平易近人，冇扮嘢，佢企係台上誰可匹敵？我聽羅君左講，佢有事阿梅就送咗一張冇銀碼嘅支票畀佢。我好佩服阿梅，佢嘅離開都有好多延續，佢嘅慈善、佢嘅故事，由四歲一個歌女變成一個搞慈善活動咁成功嘅人，佢冇白活到……我正在向佢學習，我唔想做廢人，睜大眼等夜晚，拜拜咗問我一生做過乜？我乜都冇做過……我唔想囉！而家佢哋（好友）叫我『淘小姐』，因為我經常喺網上淘寶，我唔介意著二手衫，好多謝阿姐（汪明荃）、拉姑（狄波拉）時時送衫畀我，上次無綫 50 周年我嗰件衫 15 蚊，我要宣揚環保，我希望自己真係有啲嘢做出嚟。我而家最擔心就係梅媽媽（阿梅母親），佢年紀大，以前我哋經常有接觸嘅，始終佢係一個老人家……」
|
鍾意就快D Share啦！
|
|
|
