2021年11月12日星期五

頭條獨家丨鍾柔美兼顧事業學業攰到爆鏡頭後「放蚊」靠窗企 #鍾柔美

頭條獨家丨鍾柔美兼顧事業學業攰到爆鏡頭後「放蚊」靠窗企

鍾柔美兼顧事業學業，戲外攰到爆。

TVB《聲夢傳奇》成功捧紅咗一班學員，因此再為他們度身訂做青春偶像劇《青春本我》嚟培育年青偶像。14歲嘅鍾柔美（Yumi）係劇中女主角之一，戲裏戲外都係中學生的她都係做返自己，最大「天敵」反而係同時間應付工作及學業，搞到冇覺好瞓，鏡頭後Yumi攰到軟晒兼「放蚊」。採訪：方騫平張詠森

14歲嘅鍾柔美（Yumi）平日要返學，假日先可以開工拍劇集《青春本我》，加上繼炎明熹後第二位擁有個人單曲嘅《聲夢》學員，為劇集《青年心城之撐起青春》唱主題曲《不想輕躺》，一吓子要應付功課、宣傳兼開工拍劇，對Yumi嚟講真係有啲攰，算係入行後面對第一個嘅挑戰。

領悟力高甚少NG

日前某個周六嘅早上，鍾柔美、詹天文（Windy）、林沚羿（Venus）等喺一間國際學校拍外景，劇情講Yumi在校園內張貼宣傳海報，卻被Venus欺凌，不懷好意上前「兇」走她，令Yumi一臉委屈離開。之前拍檔冼靖峰踼爆Yumi拍劇時狂NG，但本報記者現場直擊所見，經導演從旁解說後，Yumi即做到導演要求，領悟力幾好。惟獨一聽到劇組嗌：「Cut，得咗。」鏡頭後嘅Yumi火速九秒九「放蚊」鬆一鬆，見她攰到成個身軟晒，行埋去靠住窗邊借力企，不過，每次「快叉」(電)後，埋位就精神奕奕，年紀輕輕已好專業。

另外，當日亦有一幕講林智樂及孫漢霖依依不捨送別老師JW(王灝兒)場口，鏡頭後嘅JW係咁笑，拍得相當enjoy。