台灣藝人劉畊宏依家成為內地平台開直播示範健身操嘅「全民健身導師」，爆紅後即成短片平台台柱，人氣居高不下，但人紅多是非，尋日（30日）意外捲入內地直播主辛巴同平台嘅戰爭，被辛巴爆料佢都曾經賣過「糖水燕窩」假貨！KOL辛巴當初因為賣假燕窩事件，最後「1賠3」賠償2.7萬名消費者近2,400萬元人民幣（約2,730萬元港幣），佢尋日重提此事，並點名短片平台開戰，一開波就拖劉畊宏落水寫道：「當初貴平台的諸多網紅以及明星（包括貴平台當紅的劉畊宏）賣了同款燕窩。」辛巴事後因「貶低或損害平台形象」，被平台禁止直播24小時。
而當事人劉畊宏尋晚仍然開健身Live，表示自己爆紅後其實可以上節目賺錢，但仍希望同網友們一齊Gym一gym，更激動到即場落淚，情緒疑常波動。對於佢被控賣假燕窩一事，尋晚衝到微博熱搜榜首，一晚時間更有5.6億閱讀量。
劉畊宏今日（31日）終於公開發文，開頭第一句就話「辛苦同事們」，原因係同仁喺前一晚搵到2年前合作嘅公司，並要求對方提供數據同證明，對此佢鄭重道歉：「對於我先前合作的公司選品不夠嚴謹，導致信任我的消費者受到損害」並保證依家嘅團隊會謹記呢個經驗，更加嚴格把關每樣商品。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
