獨家丨方伊琪開Show唔敢請汪明荃做嘉賓 唱足47年從來唔會爭名奪利
方伊琪（方姨）將於下月2日在文化中心舉行《琪妙的約會演唱會》，她事先張揚會獻唱偶像汪明荃的經典歌。方姨最喜歡阿姐工作守時認真，仲會鼓勵後輩：「2006年我同佢一齊拍電視劇《東方之珠》，佢知道我唔係經常拍劇，就叫我『唔使怕，讀熟佢(劇本)，你得㗎。』」方姨覺得以前嘅阿姐比較cool，問佢嘢未必肯答你，曾跟她說：「阿姐好多人鍾意你㗎，話你好靚。」豈料對方回應：「我都唔覺得自己靚！」。採訪：方騫平 攝影：朱偉彥
方伊琪好Like汪阿姐，除因阿姐工作態度認真外，原來年輕時，方姨同阿姐「撞樣」，所以對她情有獨鍾，方姨笑住說：「咁我都算係有返咁上下 (姿色) 嘅，多謝媽媽囉。」問到可會邀請阿姐做表演嘉賓？方姨自言請唔起，亦冇咁嘅膽量，只係應歌迷要求演繹阿姐嘅歌，如《萬水千山總是情》、《歸帆》等。
方姨13歲時參加TVB《聲寶之夜》歌唱比賽獲滿分，1975年開始唱歌唱足47年：「其實我只係一個唔會爭名奪利嘅師奶，最重要開心，一家人健康。老公謝永康喺1987年投資失利曾經輸咗股票，損失超過80萬，但我冇怨過佢，咁冇咗咪再搵過囉，都好感恩上天對我好好，𠵱家總算比上不足比下有餘啦。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
|
鍾意就快D Share啦！
|
|
|
