獨家丨周柏豪教連詩雅做好老婆:要戒幼稚 單身鄭融好想結婚生兩個B
周柏豪率「種星堂」藝人連詩雅(Shiga)、鄭融、梁諾妍、黎紀君、鍾浠文、陳穎妮、黃祖貽、鍾嘉駿及吳若希胞弟吳梓楓向《頭條日報》讀者拜年，望新一年身體健康。柏豪更以大前輩身份贈師弟妹幾句，除起哄叫梁諾妍生個兔B外，更「醒」準陳太Shiga做好老婆要點。採訪：方騫平 攝影：譚志光 髮型：kate@ hairculture 服裝：yanyanknits, charles and keith(黎紀君) self portrait @stylecarousel (連詩雅) 場地：富豪香港酒店
去年周柏豪參與內地《聲生不息》、《披荊斬棘》、《大灣仔的夜2》等共5個綜藝節目，還有大量商演及廣告等賺到豬蘢入水，他坦言疫情下冇穿冇爛，仲賺到「開心價」非常幸福，更自爆好多朋友都有經濟困難，他幫得就幫：「呢幾年真係過得唔容易，邊個人諗過飛機師會失業？就算我有朋友做醫療及醫生都話唔掂，所以希望人人有工做，冇工開屋企人會冇嘢食，好彩𠵱家中港通關，世界都改變緊，要向好方面進發。」
柏豪內地星馬開Show
曾連續兩年奪無線「最受歡迎男歌星」的周柏豪，剛約滿合作6年的星夢娛樂（TMG），最新廣東歌《小船大海》及國語歌《敬老爸》交由經理人公司「種星堂」製作及發行，他解釋因為想試新嘢：「𠵱家啲嘢要快，自己做有機會配合到變幻莫測嘅大時代趨勢，而且想將內地學到嘅嘢放喺自己舞台，做到自己想做嘅音樂。」他更打算今年在內地及星馬開個唱，但絕對唔會諗生多個B，亦斬釘截鐵表示唔會出「意外」：「同太太Stephanie商量過，𠵱家一人抱一個，佢哋最有安全感，生多個嘅話，其中一個就會被忽略。」柏豪又起哄叫育有一女的梁諾妍生多個，女方笑說：「咁養多隻寵物」她表示跟老公洪永城有家庭計劃，不論生仔定女定孖胎都會生多一次。
Shiga做有童真陳太
4月準新娘Shiga對生兒育女抱順其自然態度，因為婚後兩天已經要開工，她認為結婚只係姓氏改變，仲堅持保持小朋友嘅童真，對此，周柏豪即提點她：「結咗婚同先生關係會唔同咗，婚後另外有一頭家顧嘅嘢會多咗，你明唔明呀？睇嚟你仲未長大，仲係細路！」柏豪又以派利是做例子：「婚後會轟烈式派利是，朋友會帶埋仔女嚟拜年，我普遍要派6位數利是。」Shiga聽到嚇了一跳，笑言明年要去避年。柏豪即否定她說法：「𠵱家有埋電子利是冇得走雞！」Shiga自言有乜唔識，會向周柏豪及梁諾妍請教，周柏豪再認真提醒她：「夫妻間嗌交唔緊要，少少磨擦都OK，係一種溝通方式，要互相尊重。」他再三提醒Shiga要好好Enjoy一生人得一次的婚禮，因為當日好快會過去。另外，38歲的鄭融希望今年有自家創作作品及個唱外，最重要可以搵到真桃花，然後組織家庭生兩個B。
《星島頭條》APP經已推出最新版本，請立即更新，瀏覽更精彩內容：http://www.stheadline.com/
|
鍾意就快D Share啦！
|
|
|
