十優港姐麥明詩與飛機師盛勁為尋日（24日）喺酒店擺婚宴，筵開27席。據知，由於賓客眾多，婚禮分為下午和夜晚兩場舉行，連續兩日擔任司儀嘅鄭衍峰喺社交平台分享下午場嘅場內盛況。新娘子麥明詩以未曝光嘅簡約白色婚紗裙，手執花球滲仙氣，以氣質取勝，盛勁為就着一件米白色西裝。
一對新人拖住手march in時，賓客紛紛鼓掌歡呼，盛勁為緊張又怕醜，不過一對新人臉上都難掩喜悅，邊行邊向兩旁賓客揮手答謝，幸福之情滿瀉。而繼頭場以「勁甜麥」大碗作回禮禮物後，今次則送「勁甜麥」麥芽糖連梳打餅，好有諗頭。
麥明詩之後又換上另一條白色低胸拖尾婚紗及一條香檳色長裙，同老公盛勁為滿場飛。一眾好友在台上輪流高歌，其中釗峰就同麥明詩哥哥麥明山合唱《歲月如歌》，一對新人都深情對唱。麥明詩同盛勁為台下睇片時，仲感動到喊晒口。同場加映馮盈盈及鄭衍峰呢對前緋聞男女合照，陸浩明又爆料指三人因為職業病，將婚禮當作直播節目，因此綵排勁多次，真係好有心。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
