新歌《一劇之本》訴說與太太婚後經歷
伍富橋接受《香港01》專訪時分享新歌構思：「《一劇之本》係我啱啱由2字頭變3字頭嘅轉捩點，同我入咗行10年到而家嘅一個總結。個構思都係來自我自己嘅故仔，講緊一對情侶當然會有嗌交嘅時候，除咗嗌交會影響關係之外，都有好多外來嘅影響，好似做公眾人物會有網上的抨擊，甚至乎係親人同朋友嘅意見，都會令到我哋嘅關係有影響。但End up 隻歌都係想感激大家一路以來行落嚟，無論遇到任何挫折同難關，大家都會記住雙方係相愛，都會喺大家身邊，不離不棄。」
出道10年零專輯：其實都幾可悲
以往不少歌手都有提到在香港做音樂好難，伍富橋亦坦言：「其實都真係好難，好似我咁眨吓眼入咗行10年，10年嚟講一隻專輯都冇，其實都幾可悲，我自己覺得。亦都唔能夠話10年就一定要有專輯，都要檢討一下自己，所以今次呢首歌除咗有嗰個構思之外，亦都係對自己一個反思一個檢討，會唔會自己唔夠努力？會唔會自己唔夠積極？啱啱都提過我入咗行10年，出咗嘅歌都差唔多10隻，但除咗做歌手都有做演員，甚至乎半轉行，做健身教練，點解我做其他行業但都要Keep住做音樂，可能就係我一入行個初心都係想做歌手，都係因為鍾意唱歌而入行，所以就算條路好難，我都會Keep住唱落去。你問難唔難？係真係難。（有咩令你繼續堅持去做？）我諗係初心，入咗行10年我都冇放棄過唱歌，最重要係我而家已經成為咗人夫，有個家庭但身邊嗰個都義無反顧咁支持我，咁我仲有啲咩好阻住自己呢？如果我太太都支持我唱，咁我有更加多一個動力去唱。自己有生存去Run緊嘅情況下有自己嘅收入，咁我覺得做自己鍾意做嘅嘢已經係一件好幸運嘅事，所以暫時都冇諗過會放棄。」伍富橋更透露未來在音樂上會有更大的自由度：「可能會嘗試去搵我一路以嚟都好欣賞嘅製作人同作曲人去合作，希望會有多啲唔同嘅曲風帶到畀大家。」
首獲機會揀Demo：之前係收Order做嘢
談到不少與自己同期的歌手譬如胡鴻鈞和菊梓喬都相繼離開公司，伍富橋稱與公司關係很好：「所以先有歌出，都好關照我，都畀好多自由度我，由《很多很多份之一》開始，畀我揀Producer，畀我自己同Producer溝通，今次都聽咗好多次Demo，10首裡面揀一首，好開心因為做歌手有得揀Demo係一件好正常好平常嘅事，但我係做咗歌手10年，今次係第一次有機會揀Demo。之前係收Order做嘢，一嚟會話呢隻歌你唱啦，歌詞都Send埋畀你。所以今次感覺係實在咗，似返一個歌手，希望嚟緊都係呢個方式。」至於會否覺得公司競爭越嚟越大，他坦言：「絕對大，因為好多歌手都好出色，加上我都3張嘢，幾多新嘅歌手上緊嚟，全部都好多潛力，男男女女都係，再加上有一班《中年好聲音》，佢哋全部都好有熱誠，年紀比我大但佢哋個心都想出嚟參加比賽，佢哋嗰團火一定唔會比我少。（咁點突圍？）除衫囉，到時一定畀你哋影，但未係時候。我諗係勤力囉，自己有冇歌出都好，都要出多啲Cover，Keep住話畀啲唔記得你係歌手嘅人聽你識唱歌，呢個都係呢半年嚟自己一直做緊嘅嘢。」
被酸稱「億萬駙馬」：佢家底豐厚關我咩事？
伍富橋自從前年與女友梁兆楹（Shirley）結婚，因Shirley父親從事物流及食品等生意，令他被封為「億萬駙馬」。婚姻一開始就受盡矚目，當中有祝福亦有惡意留言，被問到夫妻二人如何面對：「你點樣抨擊我無所謂，我預咗，做藝人預咗畀人公開批評。但我覺得最戥我太太唔抵，最心痛係佢唔係一個公眾人物，但要畀人評頭品足，呢個係我最心痛。作為佢嘅另一半，都無辦法為佢遮風擋雨，佢可能冇表現出嚟佢介意，但作為一個正常嘅人，尤其係女仔畀人話醜樣邊個會開心？但講真，你話佢係咪最好最靚一定唔係，但佢係咪最醜一定無可能係，但點解要去攻勢一個人。我覺得我娶到呢個老婆我自己好滿足，好開心，好感恩。有時都好無奈，啲人成日話你老婆家底豐厚，你就好啦。講真佢家底豐厚關我咩事，都係佢嘅家底，唔通結咗婚我就可以擁有佢嘅家底咩？唔係，唔通我又拎份糧單畀你睇咩？我每個月公司賺幾多錢又拎畀你睇？唔會㗎嘛，但作為公眾人物我係OK，你講咩都好，無論話我食軟飯又好，肥腫難分都好，食得鹹魚抵得渴，但我最介意佢哋批評我太太，呢個一直都係我欠佢嘅，不過佢係一個IQ、EQ都好高嘅女人。」
對「出軌」二字非常反感：係死罪
至於多次被屈偷食或出軌，伍富橋表示對「出軌」二字非常反感：「自己個名後面有呢兩隻字，講真我真係好唔開心。係關乎人格嘅問題，以後啲人提到伍富橋就會話出軌嗰個，無論真假都好，都好影響我聲譽，所以嗰段時間都真係唔開心，加上好多親戚或者網民好多時候都唔睇內文，我擔心長輩見到以為係真，我唔想佢哋失望，加上呢兩個字係死罪，我個人認為係唔可以原諒，所以真係會屈住。」
敲監製房門尋演出機會：馬死落地行
未來發展，伍富橋稱希望繼續出歌之外，亦計劃再拍劇：「都想拍返劇，想自己多啲嘢畀外界見到，唔想長期上網啲人見到我個名就跟住我太太，想嚟緊新一頁多啲人關注伍富橋呢3隻字。（拍劇要敲監製房門）馬死落地行，都要同啲監製介紹吓自己，絕對都要，好正常嘅一個步驟嚟。（未必畀到重角色，你介唔介意做？）唔介意，死屍做過，殺手又做過，同一套劇死完再做返殺手都做過，你睇我唔出，被胡定欣殺咗兩次，明明喺前面殺死我下，叫我起身去後面再畀佢殺多次。上兩禮拜仲有PA打畀我問我做唔做邊個邊個跟班，我想接㗎，但唔得閒，太急啦，接唔到。（你都冇鬧佢）冇，喂，佢唔識我唔係罪，要檢討吓自己，咁都唔識我。（有時間你都會演？）會，我自己都鍾意做戲，不過唱歌同做戲我覺得自己唱歌叻啲。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
