安東尼錯失絕佳入球機會。
曼聯喺英超3比1反勝修咸頓，阿密特迪亞路表現驚為天人，正所謂「冇比較冇傷害」，巴西翼鋒安東尼馬菲奧斯就用行動證明「水貨」之名，半場入替嘅佢曾有黃金機會，但門前2碼面對空門竟然撞番個波畀門將，完美幫修咸頓「解圍」。
曼聯上半場表現差勁兼落後，領隊魯賓艾摩廉半場用安東尼入替明奈，59分鐘一次美妙組織，阿歷真度加拿祖左路傳中，安東尼遠柱趕到接應，2碼對住個空門竟然「衝過龍」，將個波撞番畀對方龍門接住，直播評述麥哥斯特表示：「好靚嘅組織、恐怖嘅射門...點解安東尼要瞓低鏟埋去？難以置信！」
曼聯花1億歐元轉會費買入嘅安東尼，據報已被掛牌出售但賣唔出，《天空體育》報道曼聯依家退而求其次，同意將佢外借減少20萬鎊周薪負擔，西甲嘅貝迪斯有意借用，但要求曼聯承擔佢至少一半人工，經過今場嘅表現，相信曼聯貼錢都要送走佢。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
