阿Sa兼任麻雀顧問
當阿Sa得悉有部關於賭的電影找自己拍，那種求知不得立即埋位開鏡的心情，頓時湧出來。阿Sa︰「直頭開正我嗰瓣，我一聽到有得打麻雀？正呀！拍呀！雖然戲中唔單止淨係打麻雀，仲有牌九、啤牌呀，樣樣都有少少研究咁啦。」
阿Sa︰「基本上成套戲，好似得我一個識玩呢啲遊戲，其他人完全係一頭霧水。我要不停解釋而家個牌面有幾緊張。」阿聰對麻雀只限鍾意睇人打，唔鍾意落場打，所以當拍戲時要投入當中，還要用另一種方法。「劇組要好人性化地，用人生的遭遇去形容眼前鋪牌有幾難打，先令我明白點解要嬲。」
MIRROR呢位成員麻雀最強
在戲中，MIRROR的Stanley邱仕縉飾演阿Sa的弟弟，幕前二人首次合作，私下原來都互相認識，原來都關麻雀事。「事源我跟Stanley都有打過麻雀，仲有Jer同Jeremy都有打過，Stanley幾搞笑嘅，但啲麻雀就麻麻地，要多啲練習。Jeremy係打得最好，真係識打。」當記者爆幾位都曾經自認是雀王時，阿Sa一臉認真，一副專家口吻︰「邊個係呀？Jer就OK啦，Jeremy真係勁嘅。」
至於問到英皇眾星中，邊位又是雀王雀后，阿Sa又有另一番點評︰「Kenny（關智斌）同Yumiko（鄭希怡）都真係好勁，兩位手氣都好好，阿嬌（鍾欣潼）手氣都好好。」身邊的張繼聰聽得出當中的弦外之音。「即是冇技術？」阿Sa︰「又唔係，打麻雀都要有運，但好似我咁就冇乜運，純打技術，哈哈……」
要數圈中最難忘一戰，阿Sa記得跟前輩的大戰。「有次好突然被Call，問我現在得唔得閒，一聽到打麻雀就立即應承，去到先知是跟前輩打，有拉姑、陳太（陳淑芬），我好緊張，前輩打法又好唔同，學到好多嘢。」
張繼聰︰輸少少好有罪惡感
阿聰在戲中要阿Sa戒賭，這又跟現實中的他相當合襯。雖然他不抗拒打麻雀，但多年來都未能愛上，「我老婆（謝安琪）都喜歡打麻雀，但都係玩成晚幾十蚊上落，是真愛。我自問唔識，太多嘢記記唔到，當工作上要記的東西都記唔到時，想留番位置去記台詞。」
阿聰對賭絕緣最大原因，是輸掉時會非常肉痛，甚至有罪惡感。「細個去長洲渡假，夜晚都係賭下錢，當時輸幾十蚊已經好驚，驚返屋企畀阿媽鬧，又自覺罪惡感好重，好似成世人就玩完，呢啲壓力就令我唔享受個過程。18歲跟阿媽上賭船，畀幾百蚊我去玩下，我都覺得黐線，幾百蚊一下就冇晒，點解唔拎嚟買波鞋都有對鞋，而且我係個好易沉迷玩意嘅人，我知如果沉迷賭搏我就死緊，所以都好克制。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
