吳家樂、鄧兆尊與謝遜在網台節目討論處境劇薪酬，鄧兆尊說如果有機會都想再拍，「好撈，又好賺，又舒服，返工時間又好。」對於這張網傳價目表，他與吳家樂都覺得可信性很低，尤其當中指「阿Joe」何晉樂得$0，二人一聽就覺得冇可能，合約藝人一定不會$0。但他們都同意劉丹一定很高薪，笑言：「用少一個丹爺，可以用多十個其他人。」家樂解釋處境劇計糧方法，年資愈長，人工愈高，他說：「人工有時係累積出嚟，所以你話丹爺，如果咁多年，Sit-com嚟講，由叉燒炳（《真情》角色）嗰時到而家，每年加少少加少少， show錢點會少？呢度$6000咪畀少咗佢囉！」網傳「金城安」周嘉洛每集$5750，僅次丹爺，兆尊直言冇可能：「安仔一定冇咁高，我肯定！一早簽約定咗個價，唔會話你而家紅咗就會突然間加咗。」
鄧兆尊當年拍足兩輯《皆大歡喜》，謝遜問到演員間會否知對方薪酬，他大爆：「女人嗰啲我哋唔知，有時成班男人傾開偈，林文龍呀，謝天華呀，祥仔（阮兆祥）都知，大約個Range幾多都知嘅。大家都係嗰個年份去傾（價錢）嘅，就傾偈話：『點呀？今日諗住加到幾多呀？』謝天華就好笑，嗰時一包煙$50，佢話：『我真係唔信呀，我上去我要求加$50，一包煙都加唔到我唔撈！』咁佢上去傾完返嚟，我話『點呀？仲有冇得撈？』佢話冇得加，咪又繼續撈囉。」他透露有一年所有人都冇人工加，公司叫「共度時艱」，又說：「嗰排好紅，冇理由$50加唔到吖，我哋要求每個月加$50都加唔到，嗰時共渡時艱係幾咁咩，不過始終公司畀咗機會大家。」
期間他們討論做臨時演員的人工，指網傳臨時演員$380一集，兆尊笑說：「我做嗰陣時我記得$140至$180度，包一個飯盒嘅啫，做死屍瞓覺。」但他與吳家樂都同意，主要睇臨時演員公司如何拆賬，有公司「食水深」，臨時演員有機會只得$100。
當時拍《皆大歡喜》，雖然鄧兆尊戲份不是最主要，但出鏡集數都有8成，拍千幾集聽起來都相當「和味」，主持問他是否憑此已賺到第一桶金，他回答：「我Show錢唔係好多，一個Show三千零蚊，因為我有個爭產事件，暴升500%之後先有呢個價錢。真㗎，唔係冇呢個價錢，升咗先拍得住阮兆祥。（吳家樂：阮兆祥出名Show錢貴！）當時我爆咗Show，出四萬零五萬蚊一個月，但啲錢唔知去咗邊。」
講開Show錢，計法其實好多，他說：「任何劇集，半個鐘入面，凸個頭出一出嚟，就會有show。（主持：如果有幅畫有你個樣？）唔同計法，真人先計。」家樂補充指每拍一套劇之前，公司會預先同你傾好Show錢，後期計法愈來愈多，有機會是1/2或1/3。家樂續道：「我都試過有套戲，有個監製話搵我，影一日相，佢話『喺套戲入面你死咗㗎喇，我想你影一張相，就係兩個主角去到見到你張Poster，你曾經係個車手，佢哋見到你，懷緬過去。你幫我影一日相，喺裡面出兩集，畀返兩個Show你，我話『咦？又OK喎！硬照咋喎。』我OK，但都要睇吓係乜嘢相，有啲最興墳前嗰啲相咁就梗係冇Show。」
主持亦再引伸到另一個話題，就是「死人利是」，家樂表示任何戲份，只要是拍殯儀館、瞓棺材、瞓停屍間等「唔吉利嘅嘢」，都會收返封利是。被問到銀碼，鄧兆尊說：「兩蚊，意思意思㗎啫，我嗰個年代係。」家樂再說：「兩家都係！攞個意頭㗎啫，都係兩蚊！」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
