般奴費南迪斯輸12碼累球隊未能取勝。(Getty Images)
周五(7日)凌晨歐霸盃16強首回合賽事，曼聯捉到鹿唔識脫角，作客皇家蘇斯達雖然一度領先，但因般奴費南迪斯鹵莽手球輸12碼，最後慘被逼和1比1。歐霸盃係曼聯今季最大希望，呢場和波亦延續今屆歐霸不敗走勢至9場，次回合返奧脫福作戰，晉級仍然樂觀。
作客嘅曼聯上半場形勢較佳，但除咗阿歷真度加拿祖一次射門，真正入肉攻勢欠奉。57分鐘曼聯打破僵局，約舒亞舒克斯接應加拿祖傳中射入，可惜開心咗只係11分鐘，般奴費南迪斯禁區內爭頂，舉高左手打中個波輸12碼，奧耶沙巴爾操刀追成1比1，曼聯之後捱到完場，保住今屆不敗身。
曼聯領隊魯賓艾摩廉賽後表示：「喺輸12碼之前，我覺得球隊表現好好，呢個決定改變咗場比賽。頭70分鐘我哋控制戰局，亦製造好多機會，贏唔到波係有啲不忿，但考慮到皇蘇最後都有機會，呢場波戰果可以好唔同，最重要係我哋準備好喺奧脫福踢決定性一戰。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
