朱栢康與伍允龍接受傳媒訪問期間，均表示能夠代表香港作品團隊入圍，已深榮幸。其中，伍允龍入行二十多年以來首次提名影壇獎項，表示會享受典禮過程：「小弟我第一次提名任何嘢，仲要係提名演技獎項，已經好開心。本身諗第一個提名會係武術指導，所以好感謝主！」他坦言提名成為生涯重要里程：「入行廿幾年承受咗好多喜怒哀樂，到呢個階段開心之餘，會退一步觀望大局。」
兩位男配角更自爆原來二人早於出道初期，便合作拍攝廣告，笑言希望大家都能夠獲得殊榮，朱栢康更大開玩笑指：「如果我哋一齊上台就互嘴」伍允龍隨即笑言考慮「伸脷」，二人更即場隔空預演法式激吻！
《九龍城寨之圍城》於日本上映以來大受當地觀眾歡迎，伍允龍表示高興之餘，亦有意向日本發展：「有啊！依家有同日本製作公司傾緊，細節遲啲再同大家分享！」伍允龍一向為幪面超人粉絲，提到參演特攝片的機會，他笑言：「我一路都好鍾意日本動畫、幪面超人、超級戰隊，如果有機會參與一定好開心！到時會要求一個鏡頭除低頭盔面罩，係我嚟㗎！」至於Fit爆身型會否被幪面制服的緊身褲難倒，伍允龍笑言：「佢哋嘅制服有好多種嘅，有啲可以鬆啲嘅！」朱栢康隨即表示：「但我都係想你著緊身褲！想你賣大包！」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
